IA-mi politikkeri: Naalakkersuisut pissaanermik tigummisut makitaniakujuttut

- Ajoraluartumik Naalakkersuisut, kommuninut aningaasatigut nunatsinni nalimmassaanermut
atatillugu isumaqatiginninniarnermi suliap ingerlaneranik, Asii Chemnitz Narup-ip eqqortumik
isornartorsiuinera makitaniakujuppaluttumik akissuteqarfigaat.

Kommuneqarfik Sermersuumi kommunalbestyrelsimi ilaasortaq Inuit Ataqatigiinneersoq Allan Pertti Frandsen oqarpoq.

Naalakkersuisoq Vittus Qujaukitsoq – tusagassiutinut 27. maj 2014 nalunaaruteqarpoq qulequtserlugu 'Nutaamik nalimmassaasariaqarnissamut tunngatillugu suliap tunngavissaqanngitsumik isornartorsiorneqarnera' – tassani ilaatigut allassimapput: 'Isumaqarpunga suliamik isornartorsiuinerup sulinerput pisariaqanngitsumik akornusersoraa, kaammattuutigaaralu ataatsimoorluta suliaqarnitsinnut nukiit atorneqarnissaat'.

Tassunga Allan Pertti Frandsen oqaaseqarpoq:

Utoqqatserpunga, sulinissinni akornusersoratsigit. Kisianni isornartorsiorneqarnissarsi saperussiuk, taava isumaliutigisariaqarparsi, ilumut politikkikkut nunatsinnik aqutsinersi ilissinnut naleqqunnersoq.

Apeqqutaalluni naatsorsueriaaseq qanoq ittoq atorneqarnersoq, Kommuneqarfik Sermersooq ajornerpaamik pisoqassappat 269 millioner kr.-inik; annaasaqarsinnaavoq aningaasat kommunip karsiani pinngitsoorneqarsinnaanngilluinnartut.

Kommuneqarfik Sermersuumi aarleqquteqartut
- Naak ilisimaneqarluareeraluartoq, Kommuneqarfik Sermersuup aningaasaqarnera ilungersunartupilussuusoq, akuersaarneqarsinnaanngilluinnarpoq, Naalakkersuisut siumoortumik ilisimatitsissutigereermassuk, Kommuneqarfik Sermersooq ullumerniit annertunerusumik nalimmassaanermi pilliuteqartariaqartoq, Allan Pertti Frandsen oqarpoq.

- Kommuneqarfik Sermersuumi aarleqqutigaarput, kommuninut nutaamik nalimmassaaneq pilersaarutaasoq, kommunimut aningaasatigut ilungersunartorsioreeqisumut nakkaattoortitsinissaa. Nalimmassaanermi annaasaqarnerit tamarmik kommunitsinni soraarsitsiortornernik kinguneqartussaapput, tamannalu innuttaasunik sullissinerup ajorseriarneranik kinguneqassaaq.

269 millioner koruunit, Kommuneqarfik Sermersuup annaasinnaasai, ima amerlatiginissaat Inuit Ataqatigiinnit naatsorsorneqarpoq:

• Kommunip ukiumoortumik ataatsimut missingersuutaasa 17 procentii.
• Meeqqat atuarfiinut aningaasaliissutaasartut 90 procentii
• Akileraarutit qaffanneri 8 procent pointinik
• Utoqqarnut ataatsimut aningaasartuutaasartut 2,6 -eriaataat