IA-mit Naalakkersuisooqatigiinnissamut siunnersuut
Isumaqatigiinniarnerit ingerlapput, Kuupik Kleistip aqagu sapaatiuppat isumaqatigiissuteqarnissaq neriuutigaa.
Naalakkersuisooqatigiinnissamut isumaqatigiinniarnerit ingerlapput. Qinersinermi ajugaasut, partiip IA-p ullumi arfininngornermi siunnersuutinut saqqummiussimasaminnut qanoq akissuteqarfigineqarnissaat maannakkut utaqqivaat, knr.gl allappoq.
Taamak Radioaviisimut ilisimatitsivoq IA-p siulittaasua Kuupik Kleist. Ullumikkut isumaqatigiinniarnerit Siumut minillugu partiinit tamanit peqataaffigineqarput, tassalu Demokratit, Kattusseqatigiit Partiiat aamma Atassut.
- Siunnersuutitsinnut apeqqutit tunngaviusussaasut arlallit ilaapput, kisianni immaanngilaq naalakkersuisooqatigiinnissamut sukumiisumik isumaqatigiissutissaq Partiiniit tamanit tusagaqartinnanga oqaatigisinnaanngilara partiit suli isumaqatigiinniarnernut tamarmik peqataanersut, Kuupik Kleist oqarpoq. Apeqqutit suut tunngaviusussaasut suunersut oqaatigiumanngilai.
Ualip naajartulernerani Kuupik Kleist isumaqatigiinniarnerit unnugu nangeqqissinnaanerat ammaffigaa, taamaanngippat aqagu tamanna piumaartoq.
- Isumaqatigiinniarnerni piffissaq atorsinnaasarput tamaat atorfissaqartipparput. Aqagu isumaqatigiissuteqarsinnaanissamut suli neriulluarpunga, kisianni qanorluunnit ittoqaraluarpat piffissaalluartillugu naalakkersuisooqatigiinnissamut tallimanngonerutinnagu isumaqatigiissuteqartoqassaaq, tallimanngorpammi inatsisartut nutaat inissititerniarlutik ataatsimiittussaapput, Kuupik Kleist oqarpoq.