IA: Nunaqarfiit akissaqartippagut
Inuit Ataqatigiit isumaqarput Kalaallit Nunaata nunaqarfiit illoqarfittulli tapersersussallugit akissaqartariaqartoq.
Partiip illuatungiliuttup IA-p nunaqarfiit Kalaallit Nunaanni ajornartorsiutit annersarinngilluaasaraat erseqqissuliuutigaa.
Partiip pingasunngornermi tusagassiorfinnut nalunaarummi naatsorsuutit takutippaat, taakkunani takuneqarsinnaavoq nunaqarfiit nunatta karsiata isertitatigut kaaviaartitaanit annerpaamik fem procentianik tigusisartut.
»Ullumikkut inuit 9000-it missaanniittut nunaqarfittut taaneqartuni najugaqarput, tassa imaappoq nunqarfinni innuttaasut nunatta innuttaasa tamarmiusut 16 procenterigaat. Naatsorsorneqarsinnaavoq Nunatta Karsiata nunaqarfinnut toqqaannartumik toqqaannanngitsumilluunniit aningaasartuutai ukiumut 200 - 300 millioner kroniusut. Kisitsisinut taakkununnga ilaapput aningaasartuutit illoqarfiit avinngarusimasuniittut iluaqutigisartagaat.
Inatsisartut Aningaasaqarnermut inatsisaat naapertorlugu nunatta karsiata isertitatigut ukiumoortumik kaaviiaartitaanit 6 milliarder kroniusuniit nunaqarfinnut illoqarfinnullu avinngarusimasuniiittunut tapiissutit aningaasartuutit tamarmisut annerpaamik 5 procentiinnaraat« IA naapertorlugu naatsorsuutit taamaapput.
– Inuit Ataqatigiit nunaqarfiit inuerusarneqarnissaannik pilersaarutinut peqajaajumanngillat. Inuerusaaneq ilaasa aallartereersimasungammassuk - taamatut iliuuseqarnissamut pivisumik sumilluunniit tunngavissaqanngilaq, inuiaqatigiinnullu akisoorujussuusinnaavoq, partii IA-p siulittaasua Kuupik Kleist tusagassiorfinnut nalunaarummi oqarpoq.
Nunaqarfiit siunissaat pillugu oqallinneq nunaqarfinni aqutsisunut apriilip 28-iani qinersinissaq sioqqullugu ingerlavoq.