IA: Oqaatsinut tunngatillugu siunnersuut atorsinnaanngilaq
Siumup oqaatsit pillugit siunnersuutaata qallunaatut oqaasillit Inatsisartunut qinigassanngortissinnaajunnaarsissavai, IAp oqaaseqartartua oqarpoq.
Kalaallit oqaasiisa kisimik Inatsisartut oqaluttarfianniit atorneqartannginnissaannik Siumup siunnersuutaa naalakkersuisuutitaqartut Inuit Ataqatigiit akuersaarsinnaanngilluinnarpaat.
Siumup siunnersuutaa akuersissutigineqassagaluarpat qallunaatut oqaasillit demokratiskiusumik pisiunnaatitaaffitik atorlugit Danmarkimi folketingimut, inatsisartunut nunatsinnilu kommunalbestyrelsinut qinigassanngortissinnaajunnaassagaluarput, IAp oqaaseqartartua Aqqaluaq Egede allakkatigut qisuariaateqarluni allappoq.
– Inatsisartuni kalaallisuinnaq oqaluttoqartalissagaluarpat innuttaaqatitta qallunaatuinnaq oqaasillit qinigaasinnaanertik annaassagaluarpaat. Taamatut pisoqarsinnaanera Inuit Ataqatigiit akuersaarumanngilluinnarpaat, Aqqaluaq Egede allappoq.
Erseqqissaatigaa, IAp kissaatigigaa, namminersulerneq 21. juli 2009-imi eqqunneqartoq innuttaaqataasut tamarmik sunniuteqaqataallutillu peqataaneratigut atuutsinneqassasoq.
– Tamattamik oqarnermi Kalaallit Nunaanni innuttaasut tamarmik pineqarput, qallunaat innuttaaqatigisagut ilanngullugit. Innuttaaqatigut tamakku qallunaatuinaq oqaaseqarput, kisiannili aamma Danmarkimi folketingimut, Inatsisartunut kommunalbestyrelsinullu qinigaasinnaassuseqarput taamalu namminersornermik ilusilersueqataallutillu atuuttitseqataasussaallutik, Aqqaluaq Egede oqarpoq.
Ilangullugulu eqqaasitsissutigaa kalaallini inuiaqatigiinni aamma kalaaleqarmat qallunaatuinnaq oqaluttunik, taamaattorli ilaqutaqarnermikkut inuiaqatigiinnut ilaalluinnartunik.
– Inuit Ataqatigiit erseqqissaatigerusuppaat, kalaallisuinnaq qallunaatuinnarlu oqaasillit tamarmik demokratiskiusumik ingerlatsinermi inatsisiliornermilu naqisimaneqanngitsumik oqaaseqarsinnaassuseqarmata, Aqqaluaq Egede oqarpoq.