IA-p illuatungiliuttut katersorniarpai
Partiit akimorlugit suleqatiginnikkusuppugut - aamma Demokraatiusimasunik - perusuppata, Kuupik Kleist oqarpoq.
Inuit Ataqatigiit piareersimapput suleqatigiinnissaq pillugu illuatungiliuttunik allanik naapitsinissaminut.
Taamatut oqarpoq IA-p siulittaaasua Kuupik Kleist, partiimi siuttut Qoornumi aasaanerani ataatsimiinnerisa kingorna. Tassani sapaatip akunnerata naanerani qaangiuttumi naapeqatigiipput siulersuisuunerit inatsisartunilu gruppi.
– Illuatungiliuttut suli katersuukkusuppavut Inatsisartuni partiit akimorlugit suleqatigiinnissamut. Illuatungiliuttut tamaasa tassunga qaaqquniarpavut. Taava namminneq aalajangissavaat peqataarusunnerlutik, Kuupik Kleist oqarpoq.
Taamatut nalunaaruteqartoqarpoq Inatsisartuni kingullermik pisoqarnerata kingorna, tassa ilaasortat marluk Inatsisartuni Demokraatit gruppiat qimassimammassuk.
Per Berthelsen Sermitsiamut oqarpoq Kuupik Kleist allakkatigut attaveqarfigisimallugu, mannali tikillugu piviusorsiorpallaanngitsumik. Demokraatiusimasoq malillugu partiit allat aamma taanna attaveqarfigisimavaat.
Per Berthelsenilli naatsorsuutigaa piviusumik amerlanerusunik saaffigineqarnissani, Inatsisartuni kikkut taaseqatigisassanerlugit aalajanginnginnermini.
Taassuma oqaatigaa Inuit Ataqatigiinni ilaasortanngorniarluni qinnuteqarsimanani.
Sermitsiaq atuaruk.