IA-p inuusuttai: Siumut inuiaqatigiinni avissaartuutsitsivoq
IA-p inuusuttaasa Siumut isornartorsiorpaat, oqaluttarfimmiit kalaallisuinnaq oqaluttoqarnissaanik siunnersuuteqarmat.
Namminersornerup juunip 21-anni eqqunneqarnerata kingorna ataatsimoornissaq, nammaqatigiinnissaq inuiaqatigiinnilu kikkut tamarmik akuunissaat sulissutigineqartariaqartoq isumaqatigiissutaavoq.
Namminersuleratta imaanngilaq inuiaqatigiinni inuit aalajangersimasut kalaallisut oqalussinnaannginnerat pillugu mattunneqassasut, IA-p inuusuttaani siulittaasoq Jane Petersen knr.gl-imut oqarpoq.
Maluginiarpaa oqaatsit nunatsinni ilinniartitsissutaasut tassaasut qallunaat oqaasii.
– Nunatta avataaneersut nunatsinni oqaatsitsinnik ilinniartitsinissaat nukissaqarfigisimanngilarput, taamaammat demokratiskiusumik oqallinnermut peqataanissaannik mattunneqartariaqanngillat, IA-p inuusuttai sinnerlugit Jane Petersen oqarpoq.
Siumup siulittaasua Aleqa Hammond isumaqataanngilluinnarpoq.
Akerlianik isumaqarpoq nunatsinni inatsisiliortut nunatsinni pisortatigoortumik oqaatsit atorneqarnissaannik piumasaqarnerat inuiaqatigiinni katersuuffiullunilu allaat kalaallisut oqalussinnaanngitsut ilinniarnissaannik kajumilersitsisussaasoq.
ALLAASERISAQ ATUARUK: Aleqa H.: Oqaatsit pillugit siunnersuut pissusissamisoorpoq
Demokratit Atassulu Siumup siunnersuutaani isumaqataanngillat.