IA-p qineqqusaartitaa taasisitserusuppoq

Sulinermik Inuussutissarsiuteqartut Kattuffiat, SIK, urani paquminartunngortinngikkaluarlugu oqallittoqarnissaanut sisamanngornermi kaammattuivoq.

SIK isumaqarpoq urani nunatta pisuussutaatut isigalugu nunarsuarmioqatitsinnut akisussaaqataalluta iluaqutissanngortillugu atorluartariaqaripput.

Maanna Inuit Ataqatigiit Inatsisartunut qinigassanngortitaat, Aputsiaq Blytmann, urani pillugu isummersorpoq.

- Uranimut taasititsinissaq oqallisigineqaleraagat nipi tusarsaaleraluttuinnartoq tassaavoq taamaasioruttagooq suliffeqarfiit qimarrassasut. Ilaatigungooq aatsitassat tungaatigut politikki allanngorarpallaassaqimmat.

Atuaruk: SIK: Urani iluaqutaali

Taama Inuit Ataqatigiit Inatsisartunut qinigassanngortitaat, Aputsiaq Blytmann, oqarpoq, imalu nangippoq:

- Innuttaasut taasitinneqanngippata qaqagumut avissaartuuffiusussaavoq. Aatsitassarsioqatigiiffiit nunap politikkia kisimi qiviarneq ajorpaat, innuttaasut isumaat aamma paaserusuttarpaat. Malugigunikku innuttaasut akornanni aatsitassarsiornerup tungaatigut avissaartuuttoqartoq aningaasaliisussanik nassaarnissaat ajornakusoortittarpaat.

Aputsiaq Blytmannimi isumaqarpoq Naalakkersuisuusimasut inuiaqatigiinni paasisitsiniaanissaminnut pisussaaffimminnik naammassinnissimanngitsut, tamannarpiarlu tunngavigalugu inuiaqatigiinni avissaartuuttoqartoq.

- Naalakkersuisuusut pisussaapput innuttaasunik sapinngisamik katersuutsitinissamik avissaartuutsitinaveersaarlutik. Uran tungaatigut innuttaasut akornanni avissaartuunneq naammaleqaaq, inuiattut isumarput aatsitassarsiorfinnut takutittariaqarparput.

Taamaammat Aputsiaq Blytmanni – Inatsisartunut qinigaassaguni – sorsuutigerusuppaa urani pillugu inuiaqatigiinni taasisitsisoqarnissaa.

- Innuttaasut qulaatiinnarneqassanngillat, uranip tungaatigut tusaaneqarnissaat pisariaqarpoq, oqarpoq.