IA Paamiuni nalliuttorsiussaaq
Inuit Ataqatigiit nuna tamakkerlugu ileqquusumik ataatsimeersuarnini Paamiuni ingerlatissavaa. Tamanna pissaaq juunip 24-anit 26-anut.
ATAQATIGIINNEQ oqaasertaliullugu IA, Inuit Ataqatigiit Paamiuni ataatsimeersuassapput. Siulersuisuunernik nutaanik qinersisoqassaaq kiisalu tullianut qinersivimmut anguniagassat allattorneqassallutik. Taamatuttaarlu ataatsimeersuarnermi isummerfigineqassaaq partiip inatsisartunut qinersinermi siuariarujussuarnera sumut atorneqassanersoq naalakkersuisunngortitsinermi isumaqatigiissut eqqarsaatigalugu.
Ataatsimeersuarneq ingerlanneqassaaq juuni 24-aniit 26-anut.
Taaseqataasinnaasut nunami tamaneersut, Inatsisartuni, Naalakkersuisuni aammattaaq Folketingimi ilaasortaq tassaapput aallartitat 54-it. SIK, KNAPK, ICC, Kalaallit Nunaanni Nipilersortartut Kattuffiat, Siumut aammattaaq Kattusseqatigiit Partiiat tamarmik peqataanissartik nalunaarutigisimavaat.
Savalimmiuni Repiblikanerit siulittaasuat Høgni Hoydal aammattaaq SF-it Folketingimi sinniisuat Turid Leirvoll aamma peqataaniarlutik nalunaarsimapput.
Sisamanngorneq 25. juuni Paamiuni inuttaasut nuannartaartinneqassapput nipilersortuussallutik Liima Inui, rappertartut Don Maliko, JoSPal-G Feat aamma Ikiuna.