IA pilernguppaat
Sapaatiummat KNR-TV-ikkut partiit siulittaasuisa apeqqarissaarfigineqarnerat nalilissagaanni Inuit Ataqatigiit naalakkersuisooqatissaaleqinavianngillat.
Qinersisartut qanoq taasiniarnerannik isumasiuinerit siulittuutaat eqquutissappata, taava marlunngorpat Inatsisartunut qinersinermi IA ajugaassangatinneqarpoq, taamaassappat partiip naatsorsuutigisinnaavaa partiinit tamanit naalakkersuisooqateqarsinnaanini.
Sapaatiummat partiit siulittaasuisa apeqqarissaarfigineqarnerisa takutippaat partiit tamarmik atitumik tunngaveqarluartumillu suleqatigiinnissamik isumaqatigiissuteqarnissaq tapersersoraat. Aamma Siumut naalakkersuisooqataarusussinnaasutut piareerimarpasippoq, aammaattaaq IA siuttuussagaluarpalluunniit.
– Kikkunniluunniit mattussinianngilagut. Suleqatigiinnissamut tamanut ammavugut, tamanna eqqortumik imminut tatigeqatigiinnarmik tunngaveqarpat, inatsisartunut qinigassanngortittoq Per Berthelsen, Siumut sinnerlugu qallunaatut partiit siulittaasuisa apeqqarissaarfigineqarneranni oqarpoq.
Apeqqutaaginnarporli IA-p Siumut suleqatigisinnaaneraa.
Naak IA aamma Siumut qangaali assigiimmik soqutigisaqartaraluartut, taava Kuupik Kleistip uparuarpaa ulluni kingullerni »qineqqusaarutit piviusunngortikkuminaatsut«, soorlu assersuutigalugu nunami namminermi timmisartukkut angalanissamut billetsit 200 koruuniinnallit, tamakku naalakkersuisooqatigiinnissamik tunngavissaqarnissamut ajornakusoortitsipput.
– Tassami qineqqusaarnermi neriorsuutit aamma qineqqusaarutit eqquutsinneqartariaqarput. Naalakkersuisooqatigiinnissamut tunngavissami ilanngunneqartussaapput. Kiisalu ammasumik pissuseqariarluni uanga isumaqarpunga taakku (Siumut aaqq.) imminnut mattukkiartuinnalersimasut, Kuupik Kleist oqarpoq.
Toqqaannartumik aperineqarluni, IA-mik taasineq tassaanersoq Siumumik affarmik taasinerusoq, tamanna IA partiitut siulittaasuata eqqunnginnerarpaa.
– Aap, tamanna eqqunngitsoq oqaatigissavara, Kuupik Kleist akivoq.
Isumaqarpoq Atassut isummamigut Inuit Ataqatigiinnut tunngatillugu ammariartulersimasoq. Katusseqatigiit Partiiat, Atassut aamma Sorlaat Partiiat partiinut tamanut ammapput.
Demokratit suli IA-mut tapersersuipput ukiunilu sisamani tulliuttuni illuatungiliuttuunerorusupput Siumumit naalakkersuisooqateqarnissamiit.
– Naalakkersuisooqatigit IA-mit aqunneqartut uagut erseqqissumik tapersersorniarpagut. Kommuneqarfik Sermersuumi IA suleqatigaarput tamannalu iluarisimaarparput. Taava tamanna naalakkersuisuunermut ingerlateqqissinnaavaarput, partiip siulittaasua Jens B. Frederiksen Demokratit oqarpoq.