suliffissaaleqineq
IA: Suliffissaaleqineq anigorniarlugu tapiineq pipallataavoq
Suliffissaaleqineq anguniarlugu tapiisoqarnissaanut Inuit Ataqatigiit tapiinissamik isumaqataanatik taasipput
Aningaasaqarnermut Akileraartarnermullu Ataatsimiititaliami ilaasortat amerlanerussuteqartut suliffissaaleqineq anigorniarlugu tapiissutinik qinnuteqaatit akuersissutigaat. 174,2 million koruunit atorneqassapput, taakkulu sanaartornermut iluarsartuussinermullu aningaasaateqarfimmit aaneqarput.
Ataatsimiititaliami taasinermi Inuit Ataqatigiit qinnuteqaammut isumaqataanatik taasipput.
- Qinnuteqaat pipallataq arlalitsigullu toqqaannartumik eqqunngitsumik paasissutissiisoq akuerissallugu amerlanerussuteqartut toqqarmassuk Inuit Ataqatigiinnit akuersaarneqarsinnaanngitsutut isigineqarpoq, IA-mit oqaatigineqarpoq.
Ataatsimiititaliami nangaassutigineqarsimavoq ilumut qinnutigineqartut akuersaarneqarnissaat. Aalajangiinermut eqikkaanermi takuneqarsinnaavoq ataatsimiititaliaq aningaasaqarnermut naalakkersuisumut Vittus Qujaukitsumut apeqquteqaateqarsimasoq, tassani pingaarnersiuisoqarnissaa pisariaqartinneqarluni.
Siumut Atassullu akissuteqartoqarnissaanut utaqqeqqissinnaasimanngillat, qinnuteqaallu 174,2 million koruuninik naleqartoq akueralugu.
Kisitsisit eqqunngitsut
- Taamaakkaluartoq suliniutit aningaasallu arlallit allarluinnarmut, tassalu
suliffissaqartitsiniutitut immikkut ittumik iliuuseqarnermut tunngasut qinnuteqaammi taakkartorneqarsimapput. Tamannalu pissutaalluni qinnuteqaatip suliariniarnera pisariaqanngikkaluamik pisariusimavoq. Tamatuma saniatigut aningaasat sumut atorneqarnissaannut Naalakkersuisut takussutissiatut tabeliliaat eqqunngilaq, tamannalu Aningaasaqarnermut Ataatsimiititaliami amerlanerussuteqartut ajorinngilluinnarpaat. Kisitsisit paasissutissallu eqqortut tunngavigalugit Aningaasaqarnermut Ataatsimiititaliaq pinerit tamaasa aalajangiisassasoq Inuit Ataqatigiit isumaqarput, ataatsimiititaliami ilaasortat IA-meersut, Kuupik Kleist, Naaja Nathanielsen Hans Aronsenilu nalunaarput.
25,9 million koruunit sumut atorneqassanersut suli aalajangerneqanngilaq. IA taasinermut akuersinani taasisariaqarsimavoq, naluneqarpormi taakku sumut atorneqassanersut.
Tamatuma saniatigut ukiumi tulliuttumi aningaasanut inatsisissap 52,5 mio. kr.-inik maannangaaq Naalakkersuisunit ilanngarneqarnera tunngaviusumik isigalugu toqqissisimanartinnagu IA nalunaarpoq.
- Aningaasaqarnikkut attanneqarsinnaasumik politiki Naalakkersuisut arleriarlutik saqqummiunniarlugu oqaatigisaat ujartorparput. Naalakkersuisut aningaasaqarnikkut attanneqarsinnaasumik ilumut ingerlatsinersut suli takusaqarfiginngilarput, Inuit Ataqatigiinnit oqaatigineqarpoq.