uran pillugu oqallinneq
IAp inuusuttai: Avissaartuutsitsinak innuttaasunik katersuutsitsigit, Aleqa
Inuit Ataqatigiit inuusuttaat Inuusuttut Ataqatigiit isumaqarput uran pillugu oqallinneq suli amigarpallaartoq
Uranimut naaggaarluinnarneq naalakkersuisut atorunnaarsinniarpaat isumaqaramik uran pillugu nalunaarutit oqallinnerlu aalajangernissamut tunngavissiisut. Inuusuttulli Ataqatigiit allamik isumaqarput.
Inuusuttut Ataqatigiit toqqissisimanngissutigaat uranimut naaggaarluinnarnerup atorunnaarnissaata oqallisaanerani inuiaqatigiinni avissaartuunnerujussuaq. Inuit Ataqatigiit inatsisartuni akerliunerminnut tunngavilersuutigaat aalajangernissamut ilisimasat annikippallaartut. Tamannali Naalakkersuisut isumaqatiginngilaat isumaqaramik nalunaarutit oqallinnerlu pereersut naammattut.
Nalunaarutit naammanngillat
- Inuusuttut Ataqatigiinnimi isumaqanngilagut nalunaarusiat arlallit saqqummernikuummata oqallinneq naammattoq pereersoq. Aap oqallitsitsisoqartarnikuuvoq, kisiannili maanna oqallinnerup annertuup takutippaa suli ilisimasat amigarujussuartut, Inuusuttut Ataqatigiit siulittaasuat Mùte Bourup Egede tusagassiutinut nalunaarummini allappoq.
Inuusuttut Ataqatigiit isumaqarput uranimut naaggaarluinnarnerup atorunnaarsinnissaanut tunngavissiisussat tassaasariaqartut immikkut ilisimasallit arlaannaannuulluunniit pituttorsimanngitsut.
- Naalakkersuisut siulittaasuat, avissaartuutsitsinak innuttaasunut katersuuffiusimik suliniarit!, Múte Bourup Egede oqarpoq innuttaasullu peqataatinneqarnerunissaat ujartorlugu.