ICC Obama pillugu: Nunarsuarmi nutaamik neriuutissaqalerpoq
Barack Obamap USA'p præsidentiatut ivertinneqarnerata inuiaat amerikarmiut maanilu nunarsuarmi inuttaasugut nutaamik neriuutissaqartilerpaatigut, ICC isumaqarpoq.
Inuit akornanni inuit pisinnaatitaaffii pillugit suliniaqatigiiffiup maluginiarpaa, Barack Obamap ivertinneqarnermini oqalugiaatimini tikkuarmagu nunarsuarmi unammilligassanut nutaanut tunngatillugu akissutissat nutaajusariaqartut. Taamatullu eqqarsarneq aamma Kalaallit Nunaannut pisussaaffiliivoq.
- Nunarsuup silaannaata kissatsikkiartorneranut tunngasut, Issittumik annertuumik ilisimaneqanngitsumillu kinguneqartussaq, Obamap aqutsinerata nalaani qaqinneqassapput. Kalaallit Nunaat ineriartornermi siuliuniartariaqarpoq. Tamatumalu aamma pisariaqalersippaa Nunatsinni killilersorneqanngitsumik oqallisigisariaqaripput, pisuussutinik umaatsunik atuineq kiisalu avatangiisitta qanoq issusianut tunngatillugu killissat sumiinersut kiisalu minnerunngitsumik uagut nammineq peqqissuserput, ICC-Kalaallit Nunaani præsidenti Aqqaluk Lynge tikkuaavoq.