ICC-p ataatsimeersuarnera naammassivoq
Ukiuni sisamani tulliuttunit sulinissamut tunngavissaq akuerineqarpoq aatsaallu siullermeertumik inuit oqaasii sisamat atorlugit allaqqaarneqarluni.
ICC-p aqqanilissaanik ataatsimeersuarnera sisamanngornikkut ualikkut naammassivoq, sulinissamullu suliniutissatut aalajangersagaq 54-inik immikkoortortaqartoq Nuummi isumaqtaigiissummik taagorneqartoq akuerineqarluni.
- Aatsaat taama pitsaatigisumik piginnaatitsissummik tunngaveqarluni ICC-mi siulersuisut sulisinnaalissapput, siulittaasunngorlaaq Aqqaluk Lynge tunngavissat akuerineqarnerisa kinguninngua tusagassiuutinut oqarpoq.
Sulinissamut pilersaarutit assigiinngitsunik immikkoortoqarput, siulersuisut suliareqqitassaannik.
Akuerineqartut ilagaat inuit siuttuisa ataatsimeersuariaqqunissaannut siulersuisunut piginnaatitsissut, isittumi aatsitassarsiornermut atatillugu ataatsimoorussamik isummernissaq siunertaralugu, kiisalu suliffeqarfinnut avatangiisinut innuttaasunullu sunniutissat misissoqqissaarnissaat.
Immikkoortoq taanna kalaallit aallartitaannit siunnersuutaavoq, tassanilu aallaaviuvoq Nunatsiavumi naalakkersuisut aappaagu marsimi Baker Lakemi uranisiortoqassanersut isummerfigisussaammassuk, knr.gl allappoq.
Nuummi isumaqatigiisutip qallunaatuua talerpiatungaani atuaruk.
ICC-p nunatsinni siulersuisuinut qinerneqarpoq Carl Christian Olsen, Puju, aamma nunatsinni ICC-mi siulittaasunngortoq kiisalu Hjalmar Dahl.