ICC-p imminut toquttut ikilisinniarpai
ICC-p imminut toquttoqarneranik oqalunnerup paquminarunnaartunngortinniarpaa, taamatullu imminut toquttut ikilisinniarlugit. ICC taamaammat videonik arlalinnik saqqummersitsivoq, videoni inuusuttut sammisaq oqaluuseraat.
Nittartakkami pilersinneqaqqammersumi videot 30-t sinneqartut saqqummersinneqaqqammerput. Issittumi
Siunnersuisoqatigiinni Piujuartitsinermik tunngaveqarluni ineriartortitsinermut Suleqatigiissitap
suliniut CREATeS pilersitaraa, ICC Greenland aamma ICC Canada suliniummi aqutsisuullutik.
ICC Greenland tusagassiutinut nalunaaruteqarluni taama ilisimatitsivoq.
- Issittumi nunat inoqqaavisa inuusuttaasa oqaluttuaat nittartakkakkut saqqummiunneqarput, oqaluttuanilu taakkunani inuusuttut imminortarneq pillugu isertuaratik, sakkortuumik oqariartuuteqarlutik namminnerlu inuttut paasisimasaqassusaannik ersersitsipput, ICC-p tusagassiutinut nalunaarutaanni allassimavoq.
Videot 30-t sinneqartut
Videot nittartakkami ICC-p saqqummersitaani takuneqarsinnaapput.
Canadami, Kalaallit Nunaanni Alaskamilu nunap inoqqaavisa inuussuttortai imminut toquttarneq pillugu oqaluttuartunut ilaapput.
Kalaallit inuusuttut videoni qulingiluani peqataapput.
- Tamatta toqusussaavugut. Ilumoorpa pinngortinnata inuunissarput
nammineq aalajangertaripput?... Inuunermini suliassani naammassigamigit toqua? Uiloq Knudsen, Ilisimatusarfimmi ilinniartoq videot ilaanni taama aperivoq. Inuuneq toqulu pillugit taanna eqqarsaatersuuteqarpoq. Video uani takusinnaavat.
CREATeS
Issittumi nunat arlallit suliniummi CREATeSimi suleqatigiipput. CREATeS arfineq-pingasunik inerniliussaqarpoq arfineq-pingasunillu innersuussuteqarluni.
- Issittormiut akornanni imminut toquttartut suli amerlavallaarujussuarnerat ajornartorsiuterujussuuvoq, pingaartumik Issittumi nunat inoqqaavisa inuusuttaasa akornanni, inassutigineqarporlu Issittumi Siunnersuisoqatigiit aammalu Piujuaannartitsinermik tunngaveqarluni Ineriartortitsineq pillugu Suleqatigiisitaq, Issittumi tarnikkut peqqissusermik siuarsaalluni imminullu toquttarnermik pinaveersaartitsilluni sulinerminik nangitsissasut, innersuussutit ilaat taama allanneqarsimavoq.