Icelandair Savalimmiunut timmisartuussisalissaaq
Ukiup sisamararterutaani innermik anitsisoqarnera pissutigalugu timmisartuussinerit amerlasuut taamaatiinnarneqaraluartut, Icelandair 2023-mi 560 millionit koruuninik sinneqartooruteqarpoq. Ukioq manna timmisartuutileqatigiiffik Savalimmiunut timmisartuussisalissaaq.
Islandimi tusagassiorfiit arlallit naapertorlugit 2017-imiilli siullermeerluni Islandimi timmisartortitseqatigiiffik Icelandair sinneqartooruteqarpoq, siornalu ilaasut 17 procentinik amerleriarsimapput.
560 millionit koruuninik sinneqartooruteqarnerup takutippaa ingerlatseqatigiiffik 2022-mut sanilliullugu siuariarsimasoq, tassani 75 millionit koruuninik amigartooruteqartoqarsimavoq.
- Ingerlatseqatigiiffimmut tamanna angusaq pingaaruteqarpoq, Icelandairimi pisortaaneq Bogi Nils Bogason Islandimi tusagassiorfimmut RÚV-imut oqarpoq. Isertitat amerlinerat niuerfinni tamani anguneqarpoq, pingaartumik Amerikami Avannarlermi.
2024-mi aqqutit amerlanerusut
2024-mi timmisartuussinerit amerlinissaat pisortap neriuutigaa, 2023-mullu sanilliullugu 11 procentimik amerlanerussapput, tikitassanullu 57-inut timmisartuussisoqassalluni.
Bogi Nils Bogason oqarpoq timmisartortitseqatigiiffik aalajangersimasoq aqqutit nutaat pingasut ammarniarlugit: Halifax, Pittsburgh Savalimmiunilu Vágar.
2023-mi ilaasut 17 procentimik amerleriarput 4,3 millioninngorlutik, timmisartullu issiavii 2 procentimik atorluarneqarnerulerput.