Iffiortoq nutaaq
Lebekka Jerimiassen Nuummi Brugsenip iffiorfiani iffiortutut ilinniarnerminik naammassivoq.
Iffiortunngorlaaq 23-nik ukiulik Lebekka Jerimiassen Danmarkimi Holstebros Tekniske Skolemi misilitsinnerminut atatillugu illoqarfeeqqamut naammattunik iffiorlunilu kaagiliorpoq. Maannakkullu Nuummi Brugsenip iffiorfiani atorfinippoq.
Brugsenip iffiorfiani atorfinikkama nuannaaqaanga, Lebekka Jerimiassen oqarpoq.
Mesterinngorniap Uvdloriak Nielsenip iluarisimaarpaa iffiorfimi nunaqavissumik iffiortoqalermat.
- Iffiorfimmi ataavartumik marlunnik ilinniartoqartarpugut, nuannaartaqaagullu ilinniartut ilinniakkaminnik naammassigaangata inuutissarsiummilu iffiortut amerlanerulersilugit, Uvdloriak Nielsen oqarpoq.
Lebekka Jerimiassen ukiuni pingasuni qaammatinilu arfineq marlunni iffiortunngorniarluni ilinniarpoq. Narsami Inuussutissalerinermik Ilinniarfimmi INUILI-mi tunngaviusumik ilinniarluni aallartippoq, kingornalu atuagarsornertaa Holstebro teknikkimut ilinniarfiani nikerartumik ingerlallugu, Nuummilu Brugsenimi sungiusarluni.