Ikiaroornartumik eqqusseriartoq pillugu tusagassaqartitsivik oqaluttuarpoq
TV2 Østjylland-ip pisimasup qanoq pisimanera pillugu allaaserisaa naapertorlugu ikiaroornartumik eqqusseriartoq hashimik 268 gramminik kokainimillu 23 gramminik naaminiititaqarluni timmisartumut Kangerlussuarmukartumut ikisimavoq.
2022-mi ’timikkut ikiaroornartunik assartuisartunik’ taasartakkat pingasut Kalaallit Nunaannut ikiaroornartumik eqqusseriarnerminni toqupput.
Qallunaat tusagassiorfiata TV2 Østjyllandip allaaserisami takinerusumi podcastimilu toqusut ilaat oqaluttuaraa.
Angut 33-nik ukiulik Aarhusimeersoq 2022-mi juunip 22-ani Kangerlussuarmut timmisartumik angalanermini toquvoq.
33-nik ukiullip ilaqutai alianartumik pisoqarnera pillugu tusagassiiviup ilaatigut oqaloqatigai, toqusullu timaanik misissuinerup nalunaarusiaa takullugu, tassanilu takuneqarsinnaavoq angut 33-nik ukiulik timmisartumut ikigami naavani filminut balloninullu poortorsimasunik 26-nik hasheqarsimasoq sisamanillu kokaineqarsimalluni.
Timmisartumi Jettimemi attartukkami Københavnimiit Kangerlussuarmut timmisartuussinermi toqusoqarnera pisimasoq, aamma ajunaartoqartillugu ikiuiniartoqarsimasoq, Air Greenland ilisimatitsivoq.
Aamma 2022-mi angut 53-inik ukiulik angullu 42-nik ukiulik timikkut ikiaroornartunik eqqusseriarnermut atatillugu toqupput.