Ikiaroornartumik iisillutik eqqusseriartut marluk tigusarineqarput
Inuusuttut marluk ikiaroornartumik iisillutik eqqusseriartut politiinit tigusarineqarput akunnerup naanerani. Arnaq aamma kuffertimini ikiaroornartuuteqarnini pissutigalugu tigusarineqarpoq.
Iisilluni ikiaroornartumik eqqusseriartoqarsimanera pillugu Kalaallit Nunaanni politiit nalunaaruteqaqqipput.
Kangerlussuarmi inuit marluk tigusarineqarput, taakku ikiaroornartumik iisillutik eqqusseriarsimagaluarput.
Tigusarineqartut inuusuttuupput arnaq angullu, taakku Danmarkimit tikinnerminni tigusarineqarsimasut, politiinit pigaartut pisortaat Søren Bendtsen Sermitsiaq.AG-mut ilisimatitsivoq.
Timmisartoqatigiittut
Pineqartut nalunngisariinnersut Søren Bendtsenip oqaatigisinnaanngilaa. Tigusarineqartut Nuummukaanneqartullu oqaatigisinnaavaa.
- Nuummi isertitsiveqarneruvoq, aamma nakorsaq suleqatigineqartussaavoq. Tigusarineqartut timaat qinnguartarneqassapput, politiini pigaartut pisortaat nassuiaavoq.
Ikiaroornartut timaasa iluaniikkunnaarmata politiinit iparagaapput, taamaattoq politiinit misissuineq suli ingerlassaaq.
Ikiaroornartumik iisilluni eqqusseriarneq navianarsinnaavoq. Ikiaroornartumik iisisimallutik toqukkut qimaguttut ukioq manna marluupput.
Arnaq ikiaroornartumik kuffertiminiititaqartoq
Suliamut allamut tunngatillugu ikiaroornartumik eqqusseriartumik allamik politiit aamma tigusaqarput. Arnaq inuusuttoq kuffertimini ikiaroornartumik nassaarfigineqarpoq.
Suliami misissuisoqarnera pissutigalugu politiini pigaartut pisortaata oqaatigerusunngilaa ikiaroornartoq qanoq oqimaassuseqarnersoq oqaatigisinnaanngilaa. Eqqartuussivimmili arnaq killisiorneqareermat politiinit tigummigallartussanngortinneqarpoq.
Ulluni 28-ni tigummigallarneqassasoq aalajangerneqarpoq.