Ikiaroornartunik pinerluttoqartarneranut sakkussat nutaat: Politiit inunnik sunniiniartartunik atuisinnaassapput

Kalaallit Nunaannut hashimik eqqussuineq ilanngaaserisut politiillu sulineranni initoorujussuuvoq, taamatullu aamma tusagassiorfitsigut akuttunngitsumik saqqummiunneqartarput.

Maanna politiit ilaatigut ikiaroornartut pillugit pinerluttuliornernut akiuinerannik patajaallisaasussamik, inunnik sunniiniartartunik atuinissamut periarfissiisunik nutaamik inatsimmik siunnersuuteqartoqarpoq.

Inunnik sunniiniartartunik atuinikkut ikiaroornartut pillugit pinerluttuliornerit, aaqqissuussaasumik pinerluttuliornerit aamma internettikkut pinerluttuliornerit akiorneqarnerinut atorneqassapput, naalakkersuisoq ukiaanerani ataatsimiinnermi inatsisissatut siunnersuummik saqqummiussisoq oqarpoq.

Naalakkersuisut oqarnerat naapertorlugu, sunniiniarnermut assersuutit ilagisinnaavaat, politiit namminneq suliniuteqareernermikkut tuniniaasumut saaffiginninnerat aamma ikiaroornartumik immikkoortitamik, tuniniaasup pissarsiarereersimasaanik pisiniarlutik qinnutiginninnerat.

Nalinginnaasumik pinerloqataasutut paasineqartussaagaluartoq

- Malittarisassat maannakkut atuuttut aamma malittarisassat nutaat assigiinngissutigaat inuup sunniiniartup inatsimmik unioqqutitsinermi ima peqataasimanissaa, iliuuserisaa nalinginnaasumik pinerluttuliornermut peqataasutut isigineqarsinnaassalluni, aamma pissutsit nalinginnaasut ataanni pinerluutinngortinneqarsimassalluni, Inatsisinik atuutsitsinermut naalakkersuisoq, Naaja H. Nathanielsen, Inatsisartunut saqqummiussassami taama allappoq.

Taamaalilluni aalajangersakkat ilanngunneqarnerisigut sakkussanik amerlanerusunik Kalaallit Nunaanni Politiit tunineqassapput, naalakkersuisup pingaartippaa. Inatsit Danmarkimi Justitsministerietimit suliarineqarpoq, politiit danskit akisussaaffigimmatigik.

Inatsisissatut siunnersuut naapertorlugu, sunniiniartartoqarnikkut politiit inummik allamik pinerluttuliortitsinermut peqataatitsinerannik kinguneqarsinnaavoq. Politiit inunnik sunniiniartartunik atuiniartuinik pissutsit pingasut naammassineqartussaapput:

• Siullertut inatsimmik unioqqutitsinerup suliarineqalernera imaluunniit misilinneqalernera pissutissaqartumik pasilliutigineqassaaq.
• Aappaattut sunniiniarneq politiit pinerluttoqarsimaneranik paasiniaanerannut pingaarutilimmik kinguneqartussatut isumaqarfigineqassaaq.
• Pingajuattut inatsimmik unioqqutitsineq, pinerluttoqarsimaneranik paasiniaaffigineqartoq, sakkortuumik inatsimmik unioqqutitsinermut tunngassuteqassasoq.

Peqatigiiffik isorinnippoq

Piumasaqaatit pingasut tamarmik naammassineqarpata, sunniiniarnerup suliarineqalinnginnerani politiit sioqqutsisumik eqqartuussivimmit akuersissummik pisimanissaat aamma aallaaviatigut piumasaqaataavoq.

Tusarniaanermi illuatungaani pinerluttuliornerup akiorneqarnissaanut eqqarsaatigisassat illuatungaanilu inatsisitigut isumannaatsuunissamut eqqarsaatiginninnerup pisariaqartinneqartumik naligiissinneqarnissaa pingaaruteqarmat qulakkeerneqarnissaa Det Kriminalpræventive Råd-ip kaammattuutigaa.

Retspolitisk Forening inatsimmi arlalinnik aamma isorinnippoq. Ilaatigut politiit qanoq ilisoqarneratigut sunniiniartartunik atuisinnaanerat erseqqissarluarneqarsimannginnera isornartorsiorpaa.

Inatsiseqarnermut ministereqarfiup kalaallit eqqartuussisarnerat malillugu, nalinginnaasumik malittarisassat kingunerisaannik inatsimmik unioqqutitsineq, tassani piviusumik piumasaqaatitaqanngitsumik inissiisarfimmi sivisuumik sivisussusilimmik inissinneqarnissap eqqartuussutigineqarnissaa naatsorsuutigineqartariaqarluni “immikkut ittumik ingasassusilimmik” inatsimmik unioqqutitsinertut paasineqassasoq nassuiarpaa.