Ikinngutitit nukissiuutinik sipaartarnissaannik ilinniartikkit
Australiami misilittagaqarfigilluarpaat najugaqarfimmi nukissiuutit pillugit paasisitsiniaasartussanik toqqaasarneq. Ilisimatuut isumaqarput tamanna aamma Nunatsinni atorneqarsinnaalluartoq.
Gassit silaannarmik kissakkiartortitsisartut annikillisarneqassappata pisariaqarpoq innuttaasut ileqquinik allanngortitsinissaq nukissiuutinik sipaarniuteqalersitsissallugit. Periuseq pitsaasoq tassaavoq inuit naapittakkatit oqaloqatigisartakkatillu naapikkaangamikkik namminneq qanoq iliornikkut sipaarniuteqalernissaat oqallisigitissallugu.
Tamaavorlu tassa australiamiut iliuuserisaligaat suliniut »Energymark«-imik taallugu. Namminneq piumassusertik tunngavigalugu najugaqarfinni ataasiakkaani inuit ataatsimiinnerni aqutsisussatut nalunaartarput, namminnerlu naapittakkatik, oqaloqatigisartakkatik arlalinnguit ataatsimiigiaqqusarpaat (ilaquttat, ikinngutit, ilisarisimasat aamma/imaluunniit suleqatit). Igaffimmi issaariarlutik oqaluuserisarpaat nukissiuutinik sipaarnissamut siunnersuutit namminnerlu silaannaap allanngorneranut qanoq attuumassuteqarnerlutik.
Ilisimatusartoq Anne-Maree Dowd isumaqarpoq suliniut tamanna pitsaanerusumik sunniuteqartartoq nukissiuutinik sipaarniuteqarnissamut nalinginnaasumik paasisitsiniaasarnernut sanilliullugit. Qaammatit arfinillit ingerlaneranni nukissiuutinik atuinerat 30-40 procentimik annikilleriarpoq iliuutsit annikitsunnguit atorlugit, soorlu qulliit qamittarnerisigut aamma atoqqiinissamik ilinniartinneqarnikkut, Dowd ilisimatitsivoq, taanna australiamiut ilisimatusarnermik ingerlatsivianni CSIRO-mi suleqataasuusoq.
Ilisimatusartoq taanna isumaqarpoq periuseq tamanna nunani kulturinilu assigiinngitsuni atorneqarsinnaasoq. Aamma Nunatsinni.
– Kulturini tamangajanni ilaquttanut ikinngutinullu attaveqartarneq iluarineqartarpoq, ingammik nunani ungasissumi inoqarfeqartuni, soorlu Kalaallit Nunaanni, taamatut innuttaaqataasut iluaqutigalugit nukissiuutinik atuisarnerup silaannaallu allanngoriartornerata qanoq imminnut attuumassuteqarnerannik ilisimasanik siaruarterinissaq isumassarsiaavoq pitsaasoq, Anne-Maree Dowd Sermitsiaq.gl -imut oqarpoq.
Namminersornerusut qanittukkut saqqummersitaminni gassinik silaannarmik kissatsikkiartortitsisartunik aniatitsineq appartinniarlugu suliniumminni inassutigaat nukissiuutit pillugit siunnersortit naalakkersuisut gassit silaannarmik kissakkiartortitsisartunik appartitsiniaanermi suliniutini tapertaasinnaasut. Kisianni isumagigunanngilaat inuinnaat taamatut ilaqutaat ikinngutaallu iluaqutigineqarnissaat soorlu Australiami taamaattoq. Siunnersortimmi pisortanut attuumassuteqassapput nuna tamakkerlugu atuisartunut, suliffeqarfinnut aamma suliffissuaqarfinnut nukissiuutinik atuillualernissamut siunnersuisartussatut