Ikiorsiissutit: Meeqqanut tapit immikkut ittut juullertinnagu tunniunniarneqarput
Immikkut ittumik meeqqanut tapiissuteqartoqarnissaanik Naalakkersuisut qinnuteqaataat aningaasaqarnermut ataatsimiititaliamit akuersissutigineqarpoq. Angajoqqaat meerartallit isertitakinnerpaarpaat naatsorsuutigisinnaavaat meeqqamut ataatsimut aningaasat 1.000 koruunit tunniunneqassasut.
Kisitsisitaleruminaattorujussuugallarpoq akit qaffakkaluttuinnarnerisa malitsigisaanik aningaasarliornermik eqqugaasimasut ilaqutariit meerartallit isertitakinnerpaanut ilaasut, immikkullu ittumik ikiorsiissutinik pissarsinissaminnut pisinnaatitaaffeqartut qanoq annertutigisumik pissarsissanersut, taamaattorli qulakkeerneqarpoq isertitakinnerpaanut meerartalinnut ikiorsiisoqassasoq:
- Assut nuannaarutigaara aningaasaqarnermut ataatsimiititaliamit Naalakkersuisunit qinnuteqaatigut akuersaartumik suliarineqarmata. Ataatsimiititaliap akuersinerata malitsigisaanik massakkut sulissutigaarput ilaqutariinnut meerartalinnut isertitakinnerpaanullu ikiorsiissutit juullertinnagu tunniunneqassasut. Tassunga atatillugu naalakkersuisoqarfiit assigiinngitsut suliamut attuumassuteqartut aammalu nunatsinni kommunit ulappupput ikiorsiissutinik tunniussinissaq piareersarlugu, naatsorsuutigaaralu juullertinnagu ikiorsiissutit taakku ilaqutariinnut meerartalinnut tunniunneqarumaartut, aningaasaqarnermut Naalakkersuisoq, Erik Jensen (S) Sermitsiaq.AG-mut oqarpoq.
Aningaasaqarnermut ataatsimiititaliap akuersissuteqarnerata malitsigisaanik Nunatsinni kommunit aammalu Naalakkersuisoqarfiit maanna kisitseqqissaarput immikkut ittumik meeqqanut tapinik agguaassinissami periusissaq inissinniarlugu, aamma nalinginnaasumit taanna qaffasinnerusussaagami.
Annerpaaffissaa isumannaarneqarpoq
Nalinginnaasumimmi meeqqanut tapisisitsisarnermi isertitakinnerpaanut meeqqamut ataatsimut 775 koruunit missaat tapuussutigineqartarput, uanili immikkut ittumik ikiorsiinermi isertitakinnerpaarpaanut meeqqamut ataatsimut taakkununnga 1.000 koruuniussaaq.
Ilaqutariillu meerartallit aningaasanngorlugit pissarsiassaannut tunngatillugu apeqqutaassaaq angajoqqaat kisimiittut aappariillu isertissimasaat, aammalu illoqutigiit ataatsimut isigalugit isertitat qanoq inissisimanersut.
Taamaattorli nalunanngilaq isertitakinnerpaat pissarsinersaasussaasut, tassami 142.000 koruunit missaat ataallugit aningaasarsiaqarsimasut 1.000 koruuninik meeqqamut ataatsimut pissarsissapput.
Immikkut ikiorsiissutit taakku qanoq isertitaqarsimaneq aallaavigalugu annikilliartortussaapput, tassa isertitat amerliartortillugit pissarsiassat annikilliartussapput, immikkummi ittumik ikiorsiineq meeqqanut tapinik agguaasseriaatsimut assingusumik aaqqissuunneqassaaq, taamaattorli nalinginnaasumit qaffasinnerussalluni.
Ilaqutariit meerartallit immikkut ittumik ikiorneqarnissaminnut pisinnaatitaaffeqartut qinnuteqassanngillat, ikiorsiineq ataasiarluni pissaaq aningaasallu tunniunneqarumaarput, kommunit namminersorlutillu oqartussat agguaassinissamut piareerpata.
Aamma piniartunut silap pissusaata allanngorneranit eqqugaasunut ikiorsiissutit piareersarneqalerput
Paarlattuanik piniartut ikiorneqarnissaminnik pisariaqartitsisut qinnuteqassapput, taakku uppernarsassavaat isertitarisartakkatik appariaateqarsimasut, tassa ilaatigut sikunngitsoornerata kingunerisaanik isertitassaagaluanik annaasaqarsimasut allatigullu isertitaqarniarnissaminnik periarfissaqarsimanngitsut ikiorneqarnissaminnut pisinnaatitaaffeqassagamik.
Taamaattorli Naalakkersuisut aningaasaqarnermut ataatsimiititaliamit akuerineqarput konto pingaarneq aallarteqqinnissamut tapiiffigineqarsinnaanermut tunngassuteqartoq, aningaasanut inatsit 2024-moortoq atuutilerpat aatsaat ammaanneqartussaagaluartoq, siusinaarluni ammaanneqarsinnaasoq.
Ikiorsiissummut tassunga tunngatillugu immikkut mianerisassat arlaqarnerupput, aamma inatsisit malittarisassallu malinneqartussaammata, taamaammat Jensen nikussutiinnarlugu neriorsuisinnaanngilaq juullertinnagu periarfissaq taanna aamma ammaanneqarsinnaanersoq pillugu:
- Aningaasaqarnermut ataatsimiititaliap akuersinerata kingorna immikkut ittumik ikiorneqarnissamut periarfissaq ammaanneqartinnagu naatsorsueriaatsimik naammassinneqqaassaagut, ajuusaarpungalu sukkkanerusumik iliuuseqarsinnaannginnatta, kisiannili tassa inatsisit malittarisassallu tamarmik eqquutsinneqartussaapput, taamaammat neriorsuisinnaanngilanga juullertinnagu angumersisinnaassanerluta, tamannali assut neriuutigaara, aningaasaqarnermut Naalakkersuisoq, Erik Jensen (S) Sermitsiaq.AG-mut oqarpoq.