Ikkarlittoqarnerata kingorna: Imaani upalungaarsimaneq ataavartumik nalilersorneqartoq
Imaani upalungaarsimaneq ataavartumik nalilersorneqartarpoq, illersornissamut ministeri oqarpoq. Tunup Avannaani nunami allanngutsaaliukkami umiarsuaq takornariartaatip Ocean Explorerip ikkarlinneranut atatillugu taama oqaaseqarpoq.
Sapaatip-akunnerata siuliani ataasinngornermi umiarsuaq takornariartaat Ocean Explorer nunami allanngutsaaliukkami Tunup Avannaani ikkarlippoq.
Ajutoortoqartillugu ikiortissap qanoq ungasitsigisinnaaneranik pisoq takutitsivoq, tassami Issittumi Sakkutooqarfiup umiarsuaataa angineq, umiarsuaq alapernaarsuut Knud Rasmussen, 2.200 kilometerisut ungasissusilimmi inissisimavoq.
Imaani sillimaniarneq pillugu peqqut danskit akisussaaffigaat, Sermitsiaq.AG-llu illersornissamut ministeri Troels Lund Poulsen, pisoq tunuliaqutigalugu suliniutinik aallartitsissanersoq imaluunniit Kalaallit Nunaata eqqaani imartani umiarsuarnik amerlanerusut salliutinneqalissanersut apeqqutigaa.
Ataavartumik Naalakkersuisunut attaveqartartut
Ministerip apeqqut toqqaannartumik akissuteqarfiginngilaa, kisianni Illersornissaqarfiup Kalaallit Nunaanni eqqaanilu qanoq atuuffeqarnera pillugu ataavartumik Naalakkersuisunut attaveqateqartarnini, allagaqarluni akissuteqarnermini ilisimatitsivoq.
Issittumi Sakkutooqarfiup umiarsuaq ikkarlittoq qanimut malinnaaffigisimagaa aamma taassuma oqaatigaa, upalungaarsimanerlu umiarsuarnillu takornariartarnerup annertusiartornerani ataavartumik misissorneqartassasoq:
- Inunnik imaluunniit imaani avatangiisinik ulorianartorsiortoqartillugu, illersornissaqarfik pingaarnertut akisussaasuuvoq.
- Umiarsuarnik takornariartaatinik takornariarnerup annertusiartornera ilutigalugu upalungaarsimaneq ataavartumik misissortassavarput, Kalaallit Nunaannilu umiarsuarnik takornariartitsisarnerup annertussusaa pillugu oqallittoqartoq aamma ilisimavara, illersornissamut ministeri oqarpoq.
Ikkarlinneq Islandimi oqaluuserineqartoq
Naalakkersuisut ersarissumik qisuariarnerannut, tassa umiarsuit takornariartaatit nunatsinni angalasarnerannut inatsisit misissorneqarnissaannik aamma sukaterisoqarnissaanik nalunaaruteqarnerannut ministeri innersuussivoq.
Ikkarlinneq pillugu pisoq nalilersoqqissaarneqassasoq, Issittumi Sakkutooqarfik siornatigut Sermitsiaq.AG-mut ilisimatitsereerpoq. Ilisimasassarsiorlunilu Issittumi umiarsuarnik takornariartitsisartut peqatigiiffiat AECO aamma taama nalunaaruteqarpoq. Tassanilu pisortap tullia Anders la Cour Vahl, Islandimi ataatsimiinnermi oqaluuserineqareersimasoq oqaluttuarpoq:
- Annaassiniartartut takornariartitsisartullu issittumi imaatigut sillimaniarnermut aamma SAR-imut suleqatigiinnermut ARCSAR-imut ilaasut, Islandimi sapaatip-akunnerani matumani ataatsimiipput, ilaatigullu pisoq una oqaluuserineqarpoq, pisumit suut ilikkarneqarsinnaanersut ukkatarineqarlutik, Anders la Cour Vahl oqarpoq.
Ocean Explorer sapaatip-akunnerata siuliani sisamanngornermi Pinngortitaleriffiup umiarsuaanit ilisimatusarfiusumit Tarajoq-mit kaanngartinneqarpoq.