Ikummatissanut akitsuut tamanut atuutissaaq
Inatsisartut ataatsimiittarfianni tupaallannartuliorneq: Partiit tallimat tamarmik isumaqatigiipput.
Sisamanngormat ualikkut nalunaaqutaq 17.10 inatsisartut ataatsimiittarfianni tupaallannartuliortoqarluinnarpoq: Kilisaatit avataasiortut ikummatissamut akitsuummut liiterimut 25 øremut ilaatinneqannginnissaannik aningaasaqarnermut naalakkersuisup Palle Christiansenip, Demokraatit, siunnersuutaa partiit tamarmik itigartippaat.
– Kilisaatit avataasiortut Kalaallit Nunaanni CO2-mik aniatitsisut annersaasa ilagaat, nammaqatigiinnginnerulluinnassaarlu ikummatissamut akitsuummut liiterimut 25 øremut peqataatinnginnissaat, umiatsiaararsorlutik aalisartut taassuminnga akiliinngitsoornissamut periarfissaqanngilluinnartut, Siumumeersoq Karl Lyberth oqarpoq.
Palle Christiansen inatsisissatut siunnersuutaatigut akitsuummut ilaatinngitsoorniarneqarput umiarsuit timmisartullu nunanut allanut aallartut, umiarsuit uuliamik gas-imillu ujaasinermut atorneqartut kiisalu kilisaatit avataasiortut: – Timmisartut umiarsuilu tamakkua Kalaallit Nunaata avataani akitsuuteqanngitsumik orsersorsinnaapput, nunanilu allani atorneqanngitsumik akitsuuteqartinniarnissaat iluaqutaanngilluinnassaaq.
Partiilli oqaaseqartuisa tamanna isumaqatiginngilaat: – Inuit Ataqatigiit akitsuummut akiliinngitsoortitsiniarneq equtitsisussaq qularnartoqartippaat, Kaali Olsen oqarpoq, taannalu partiinit allanit tamanit taperserneqarpoq.
Namminersornerullutik Oqartussat 2007-imi nammineq nalunaarusiaata "2008-2015-imut nukissamut periusissatut iliuusissatullu pilersaarut"-ip takutippaa aalisartut assartuinermillu ingerlatsisut ikummatissanik nunap iluaneersunik atuinerup tamarmiusup 40 procentianik atuisuusut.
Inatsisartunit isumaqatigiissunit tatineqarluni Palle Christiansen neriorsuivoq timmisartunut umiarsuarnullu, inatsisissatut siunnersuummini akitsuummut akiliisannginnissaannik siunnersuuteqarfini, akitsuuteqartinneqarnissaannik nalunaarusiussalluni. Nalunaarusiaq Akileraarutinut Akitsuutinullu Ataatsimiititaliamut ingerlatinneqassaaq, tassanilu oqaluuserineqassalluni ikummatissanut akitsuutip inatsisartuni aappassaaneerneqalinnginnerani.