Ilaasoq: Minniaraluarneq eqqumiippoq
Timmisartumi ajoqusersimasumi ilaasup eqqumiigaa sooq taamak anorlertigisoq timmisartortartoq minniaraluarsimanersoq
- Anoraasuartarnera timmisartoq tingittaraa malugisinnaavarput, soorlu sajuppiluttoq. Timmisartortartup minnissani aalajangermagu eqqarsarnarpoq, sooq qummukaqqiinnannginnersoq utaqqillunilu pissutsit qanoq innersut naatsorsoriarlugit pitsaanerulerpat misileeqqilluni.
Taamak oqarpoq ilaasut 31-iusut ilaat (inuit inuttai ilanngullugit 34-iupput) Air Icelandip timmisartuutaani Dash 8-mi ilaapput, ullumi ualiartuleraa ataatsip missaani Nuup mittarfianut minniartilluni ajutoormat.
Sermitsiamik ilaasoq naapipparput, angut taanna ilaasut allat ilagalagut nassuiaaneqarnissaminik utaqqisoq, ilaasut tamarmik timimikkut ajoqusinngillat.
Timmisartoq Dash 8 Air Icelnadimit pigineqartoq ajutoorpoq, avannamut samilluni minniaraluartilluni taamaalinerani arlaannik ajortumik pisoqarsimassaaq. Timmisartoq mittarfikkut sisoorsimavoq kussarnerullu ungasinngissaanut unilluni. Timmisartup ajutoorluni unissimavoq siua kimmorluinnaq sammilluni.
- Timmisartumit niusinnaanngoratta ajori ima sakkortutigaaq, allaat assorlugu ingerlasinnaanngijalluta, ilaasoq oqaluttuarpoq.