Ilaasut taarsiiffigineqarnissaminnut piginnaatitaaffeqarput
Taamak oqarpoq immikkut SLV-mi immikkut ittunut siunnersorti Karen Riis Kjølbye, CHECK-IN.dk-imut
Kalaallit Nunaanni timmisartorneq pillugu aaqqiagiinngissuteqarneq naammasseqqammersoq kinguneqassaaq, tassa ilaasussat Københavns Lufthavnimit Kalaallit Nunaannut angalanissaat taamaatiinnarneqarsimappat, taava taakku aningaasanik 400 euronik taarsiiffigitittussaapput. Statens Lufthavnsvæsenip (SLV) qalunaarpaa, UE-p peqqussutaa 261/2004 malillugu taarsiiffigitinneqarnissamut pissutaasoq ilaasussat aallarnissaq sioqqullugu kingusinnerpaamik sapaatit akunnerinik marlunnik sioqqutsisumik ilisimatinneqarsimanngimmata, pissutsit immikkut illuinnartut pissutaasut, nittartakkami check-in.dk-imi aamma Travel Peoplemi allaaserineqarpoq.
Air Greenlandip timmisartortartullu aaqqiagiinnginnerat, illuatungeriit nutaamik isumaqatigiisuteqarnissamik isumaqatigiissuteqareernerisa kingorna, tallimanngormat taamaatippoq. Maannakkut paasinarsivoq ilaasussat aaqqiagiinnginnermik eqqugaasimasut Københavnimit Kalaallit Nunaannut bilitsillit anigaasanik taarsiiffigineqartussaasut, tamatumunnga pissutaalluni aallarnissaat sioqqullugu sapaatit akunnerinik marlunnik sioqqutsisumik ilisimatitsisoqarsimannginnera.
Tunngaviussoq taassaavoq ilaasussat Københavns Lufthavnimit Kalaallit Nunaannut sapaatit akunneri kingulliit marluk iluani bilitsillit aningaasanik taarsiiffigineqartussaanerat. UE-p peqqussutaa 261/2004 malillugu allassimavoq, timmisartuutileqatigiiffiup ilaasussat aningaasanik taarsiiffiginngitsoorniarunigit, taava timmisartuutileqatigiiffiup aallarnissaq sioqqullugu minnerpaamik sapaatit akunnerinik marlunnik sioqqutsisumik aallarnissaq taamaatiinnarneqartoq nalunaarfigisimasussaavai. Air Greenlandip timmisartuussisarnini ullormiit ullormut unitsippai kiisalu aaqqiagiinnginneq ulluni arfiniliinnarni ingerlanera pissutigalugu, timmisartuutileqatigiiffiup ilaasussat aallarnissaat sioqqullugu sapaatit akunnerinik sioqqutsisumik aallarnissat unitsinneqarneri pillugit UE-p peqqussutaani allassimasutut nalunaarfigisinnaasimanngilai.
UE-p peqqussutaani 261/2004-mi allassimagaluarpoq ilaasussat aningaasanik taarsiiffigineqassanngitsut pissutsit immikkut illuinnartut peqartillugit, kisianni Statens Luftfartsvæsen (SLV) tunngavigalugu Air Greenlandip timmisartortartunik aamma timmisartuni saqisunik mattussinera pissutsitut immikkut illuinnartutut isigineqarsinnaanngilaq, Check-in allaaserisaqarpoq.
”Aaqqiagiinneq manna pissutitut immikkut illuinnartutut isigineqarsinnaanngilaq taamaattumik ilaasut aningaasanik taarsiiffigineqassapput. Air Greenland uppernarsaatinik naammaginartunik saqqummiussisinnaasimanngilaq, taamaattumillu taarsiilluni aningaasanik akiliisariaqarpoq,” SLV-mi immikkut ittunut siunnersorti Karen Riis Kjølbye. CHECK-IN.dk-imut oqarpoq ilassutigalugulu, soorlu assersuutigalugu pissutsit immikkut ittuussagaluarput Air Greenland nunamut allamut mittussaalluni, mittarfimmi miffigisassaani suliumajunnaartoqarsimappat, kisianni matumani pineqartumi Air Greenland mattussinermut maannakkut taamaatinneqartumut akisussaaqataavoq.
Siusinnerusukkut Air Greenlandip ilaasussat aningaasanik taarsiffigineqarnissaminnut pisinnaatitaaffiat itigartippaa.