Ilanngutassiaq kingusinaarmat
Ilanngutassiaq Koda Awards nersornaasiineranik aallakaatitassiamik isornartorsiutitallip KNR'imit peerneqarneranut nassuiaataavoq- ilanngutassiaq KNR'imit kingusippallaamik tiguneqarnera
- Ilanngutassiaq Aasiaat TV/Radio'p suliaa, Koda Awards'ip nersornaasiinerata toqqaannartumik aallakaatinneqartup nipiluppallaarneranik isornartorsiuinermik imalllip peerneqarneranut tunngaviuvoq, aallakaatitassap KNR'imut kingusippallaamik nassiunneqarnera, taama oqarpoq aallakaatitsinermik pisortaaq Knud Aalua Lynge, Leif Immanuelsenip aallakaatitassiap KNR'ip sisamanngornikkut unnukkut aallakaatitassiassaannit peerneqarsimaneranik isornartorsiuineranut akissuteqarpoq.
Leif Immanuelsen, Eqqumiitsuliornermik Pinngorartitsisut Ingerlatsisunillu, EPI, siulittaasoq sisamanngornermi tusagassiivinnut nalunaarummi allappoq KNR'ip aallakaatitassiamik peersinerat; kikkut tamarmik oqaaseqarsinnaanerannik killilersuinerusoq akuersaarneqarsinnaanngitsoq.
- Siullertut oqaatigissavara KNR'ip piumasaqaatigimmagu illoqarfinni aallakaatitassiorfiit ilanngutassiamik aallakaatinneqarnissaat ullormik ataatsimik sioqqullugu nalunaarutigeqqaartassagaat. Uani taama pisoqanngilaq. Ullormik ataatsimik sioqqutsilluta tigusarnissaannut piumasaqaatitsinnut tunngaviuvoq, aallakaatitassiat assigiiaarpallaanik imallit aallakaatinneqartarnissaat pinaveersaarusukkatsigu, Knud Aalua Lynge uparuaaneq pillugu akivoq.