Ilaqutariinnermut ataatsimiitsitaliaq paasisassarsiorluni angalerpoq
Inatsisartut ilaqutariinnermut ataatsimiitsitaliaat sapaatit akunnerit tulliuttut marluk ingerlaneranni Danmarkimut paasisassarsiorlutik angalassapput. Aningaasartuutissasut missingersuutit 250.000 kr.
Ilaqutariinnermut ataatsimiitsitaliaq tallimanik ilaasortalik tallimanngorpat aggutsip 29-iani paasisassarsiorlutik Danmarkimut aallassaaq, Danmarkimi inissiisarfiit/angerlarsimaffiit assigiinngitsut paasisassarsiorfigissallugit. Paasisassarsiorluni angalanermi naalisarlugu qulequtarineqassaaq:
- Meeqqanut inussuttunullu pissaanermik atuisarneq pillugu inatsisissatut siunnersuutip oqaluuserineqarnissaa.
- Kalaallit Danmarkimi atugarliorlutik inuusut, tassunga ilanngullugit isumaginninnikkut politikkikkoortumik suliniutit.
- Meeqqanut inuusuttunullu aammalu utoqqarnut inissiiviit immikkut ittut.
Ilaqutariinnermut ataatsimiitsitaliap siullertut Aalborg tikeraassavaat, tassani Kalaallit Ulluisa ulluni makkunani aallarteruttortoq peqataaffigissavaat. Århusimi eqqarsartaatsikkut ajuutilinnit napparsimmavik Psykiatrisk Hospital Risskov pulaassavaat aamma Gelllerup Parken, tassani tusagassiorfitsigut sammineqarluartoq innuttaaqatinik nikassaasarnerit pillugit ilisimatitsivigineqassallutik. Fynimi Ringimi inussuttunut pinerluuteqarsimasunnut inissiisarfik matoqqasoq tikeraassavaat, Sjællandimilu tikeraarneq aallarnerlugu pinerluuteqarsimasunut eqqarsartaatsimikkut ajuutilinnut inissiisarfik immaqalu aamma najugaqartut pinerluuteqarsimasut eqqarsartaatsimikkut ajuutillit Kalaallit Nunaanneersut pulaarneqassapput. Kalaallit Nunaata Aallartitaqarfia tikeraartinnagu inuusuttunut pinerluuteqarsimasunut inissiisarfik matoqqasoq alla takusarneqassaaq. Aamma paasisassarsiorluni tikeraarnerit marluk ingerlanneqassapput, aappaa Autismecenteri Sjællandip kitaaniittoq aamma Østergård-imi inersimasunut eqqarsartaatsimikkut ajoqutilinnut atornerluinermik peqquteqartumik utertunngorsimasunut ineqarfissatut neqeroorfik. Tikeraagassat kingulliit tassaapput Københavnimi Kalaallit Illuutaat aamma Koefoedsskolep immikkoortortaqarfia Naapiffik.
Ataatsimiitsitaliaq marlunngornermi septembarip 9-ani Kalaallit Nunaannut utissaaq.
Angalanissamut aningaasartuutissatut missingersuut:
Timmisartumut billetit: 112.000 kroner.
Hotelini unnuinerit: 93.000 kroner.
Ullormusiat: 35.000 kroner.
Biilinik attartorneq taxallu: 10.000 kroner.
Katillugit: 250.000 kronerit missaat.
Ataatsimiitsitaliami ilaasortat tassaapput:
Siulittaasoq: Isak Davidsen (S)
Siulittaasup tullia: Emilie Olsen (A)
Otto Jerimiassen (S)
Agathe Fontain (IA)
Astrid Fleischer Rex (D)