Ilassutitut aningaasaliissutit nunatta karsianut missingersuutinut annertuumik amigartooruteqartitsisut
Coronap ajornartoortitsineranut atatillugu ikiorsiissutit kiisalu Mittarfeqarfiit akiligassaannik isumakkeerfiginninneq ilaatigut 2022-mi politikerinit aningaasaliiffigineqartut ilagaat. Politikerit katillugit 2022-mi 277,1 mio. kr.-nik ilassutitut aningaasaliissuteqarput, tamatumalu ukiumi missingersuutit amigartooruteqartippai.
Aningaasartuutit ilimaginngisat amerlasuut aningaasanut inatsimmik eqquipput. Ilassutitut aningaasaliissutinut inatsisissap, maanna Inatsisartut suliarisaata tamanna takutippaa.
2022-p ingerlanerani politikerit katillugit ilassutitut aningaasartuutit 277,1 mio. kr. akueraat. Ilassutitut aningaasartuuteqarnermi aningaasanut inatsisip amigartooruteqarfiunanilu sinneqartuunnginnissaraluanik pinngitsoortitsivoq, taamaalilluni 269,4 mio. kr.-nik ukiumut 2022-mut missingersuusiorfiusumut amigartooruteqartitserujussuarpoq.
Ilassutitut aningaasaliissutit annersaat coronamut tunngatillugu ikiorsiissutit katillugit 70 mio. kr.-t kiisalu Mittarfeqarfiit Namminersorlutik Oqartussanut akiligassaannik 135 mio. kr.-nik isumakkeerfiginninneq.
Tamatumalu saniatigut peqqinnissaqarfimmut pinasuartumik 10 mio. kr.-nik aningaasaliisoqarpoq. (Allattorsimaffik tamakkiisoq allaaserisap naqqani takuuk)
Demokraatit: Kisitsisit qaffasippallaartut
Inatsisartut ilassutitut aningaasaliissutinut inatsisissaannut siunnersuut marlunngornermi Inatsisartuni siullermeerneqarpoq, tassanilu partiimit illuatungiliuttumit Demokraatinit, Naalakkersuisut aningaasanut inatsimmut missingersuusiornermut atatillugu piviusorsiornerusoqarnissaanik kaammattuisoqarpoq:
- 2022-imi ilassutitut aningaasaliissutissatut qinnuteqaatit akuerineqartut Naalakkersuisuniit nunatta naatsorsuutai 277 millioner koruuninik appasinninngortippaat. 2021-imi kisitsisit 150 millioner koruuniusimallutik. Kisitsisit qaffasippallaarujussuarput, partii oqaaseqaammini allappoq, nangillunilu:
- Taamaattumik allatut ajornartumik Naalakkersuisut piumaffigisariaqarpakka piviusorsiornerusariaqartut, 2024-imut aningaasanuti inatsimmut siunnersuut suliarineqalerpat. Tamanna tamatsinnut iluaqutaassaaq.
Inuit Ataqatigiit: Kinguartinneqarsinnaanngitsut
Partiimi naalakkersuisoqataasunit Inuit Ataqatigiinni ilassutitut aningaasaliissutit annertuut pitsaanerarneqarput:
- Inuit Ataqatigiit ukioq kingullermi suianut ilassutitut aningaasaliissuteqarnissamik kinguneqartunik Naalakkersuisunik suleqateqarneq qujassuteqarfigaat. Matumani suliat inuiaqatigiinnut pingaarutillit kinguartinneqarsinnaanngitsut pineqarput. Naalakkersuisut; qujanaq piffissaagallartillugu isumatusaartumik iliuutsissinnut, partiimit oqaaseqaammi taama allattoqarpoq.
Nunatta karsiata inaarutaasumik inernissaa ukiumi tassani amigartooruteqarfiussanersoq, nunatta karsianut naatsorsuutit piareerpata paasineqassaaq.
Ilassutitut aningaasaliissutit tamarmiusut allattorsimaffianni qupp. 25-26 UANI takuuk.