Ilinniagaq nutaaq Sisimiuni aallartissaaq
Maskinmesterinngorniarneq Issittumi pissutsinik aatsitassalerinermullu sammisaqarfiusussaq aallartinneqassaaq.
Ukiup aallartilaarnerani suleqatigiissitaq pilersinneqarpoq, naatsorsuutigineqarporlu septembarip ingerlanerani nalunaarummik tunniussissasoq.
Nalilerneqarpoq pisariaqartitsineq piffissap ingerlanerani annertusiartussasoq, aatsitassarsiornermi annertusiartuinnartumik pisariaqartitsinerup suliffissuaqarnikkut piartuaarnera ilutigalugu.
- Ullutsinnilumi aatsitassarsiornikkut annertuunik ingerlatsisoqalernissaanut aningaasaliissutinik annikinngitsunik atuisoqalereerpoq, aatsitassanik assigiinngitsunik iluaquteqalersinnaanermi, soorlu guld-imik, saviminissamik aamma uuliamik. Misissuinerit taakkua ersersippaat immikkut pisariaqartitsisoqartoq teknikkimut tunngasutigut sullinneqarnissamik, Ilinniartitaanermut Naalakkersuisoqarfiup “Ilinniartitaanermut Pilersaarut II” saqqummiussaani allassimavoq.
Annertuumik pisariaqartitsineq
- Siunissami ineriartornissami naatsorsuutigineqarpoq annertuumik pisariaqartitsisoqalissasoq sulisunik ilisimatusarnikkut assigiinngiiaartunik aammalu ilisimasanik tigussaasuni suliani atorneqarsinnaasunik, maskinmesterini ilisarnaataasunik, ilinniartitaanermut pilersaarummi allassimavoq, maskinmesterinik pisariaqartitsineq silaannaap pissusiinut tunngasunik suliani aamma avatangiisinut tunngasunik suliani annertusiartussasut,
Ilinniarfiup Sisimiuniinnissaa anguniagaavoq, København-imilu maskinmesterskole suleqatigalugu pissaaq.
Sisimiuni ilinniarfik allilerneqassaaq
Ilinniartitaanermut Naalakkersuisoqarfiup ilimagaa, KTI Sisimiut allilerneqarnissaa pisariaqartoq.
Suleqatigiissitap suliaanni nalunaarusiaannilu aallaavigineqassapput pissutsit makkua:
- Maskinmesterinik ilinniarsimasunik pisariaqartitsineq
- Piareersaataasumik pikkorissartitsisarnerit aningaasaqarnerat
- Ininik pisariaqartitsineq, ilinniartitsisutillu ataasiakkaat pisariaqartitsineri
- Ininik pisariaqartitanik pilersitsinissanut ilinniartullu ineqarfiinut aningaasaliissutit killiliussat
- Pitsaaqutit aamma ajoqutit Sisimiuni Saviminilerinermik Ilinniarfillu najugaqarfeqatigiissinnaanermi
Ilinniarfiit allat marluk
Ilinniartitaanermut Pilersaarummi aamma paasissutissiarineqarpoq, aalisakkanik suliffissuarni maanna sulisuusut amerlasuut suliamik ilinniarsimasuunngitsut, ilimanaateqarporlu iluaqutaassasoq sulisuusut taakkua piginnaasaasa annertusarneqarnissaat. Inuussutissalerinermik Ilinniarfik INUILI taamaattumik ineriartortitsinermi suliamik nutaamik aallartitsisimavoq ilaatigut Royal Greenland suleqatigalugu.
Aammattaaq 2019-ip ingerlanerani Issittumi aalisarnikkut teknologi-mi siunnerfeqartumik diplomingeniør-itut ilinniartitaanermik aallartitsisoqarnissaa naatsorsuutigineqarpoq, taamaasilluni qularnaarneqassaaq Kalaallit Nunaanni piujuaannartitsinernik tunngavilimmik suliffissuaqarnikkut ineriartortitsisoqarnissaa, kiisalu aalisarnerup inuussutissalerinermi suliffissuaqarnikkut ingerlanneqarneranut atatillugu, nalunaarusiami allassimavoq.