Ilinniagaqarneq: Pisinnaatitaaffiiginnarani innuttaasut pisussaaffiat?

Kalaallit Issittumi najugaqarnermi nunarsuarmi pisartaapput; innuttaasulli pingajorarterutaannaat meeqqat atuarfiannit qaffasinnerusumik ilinniagaqarsimapput. Qallunaajunerusut Kalaallit Nunaata avataani inunngorsimasut suli allaffissornermi suliaqartuupput inuussutissarsiornermilu aqutsisutut atorfeqarlutik. Nunatsinni pissaaneq tigussagutsigu ilinniagaqarnerujussuusariaqarpugut, oqaatsinik amerlanernik atuisinnaasariaqarluta nunasisullu pikkorissut nunatsinni najugaqaannarnissaannik isumaginnittariaqarluta.

Kalaallit Nunaat namminersulersimagaluarpormi, kisianni innuttaasut kalaallit allaffissornermi inuussutissarsiornermilu atorfiit qaffasissut unammillissutiginissaannut pissusiviusuni ilinniarsimanngippallaarput. Ullumikkut sulisinnaasuni inuit arfiniliugaangata ataaseq Kalaallit Nunaata avataani inunngorsimasuusarpoq. Nunarput sulisussanik tikisitaagallartunik isumalluuteqartariaqarpoq. Sulisut ukiualuit ingerlareerneranni nunagisaminnut angerlaraangata Kalaallit Nunaata ilisimasat nalilerujussuit misilittakkallu annaasarpai.

Ilinniarfiit qaffasissumik pitsaassusillit tamalaat ingerlannissaannut inuiaqatigiit naammattumik angissuseqanngillat. Taamaattumik inuusuttorpassuit piginnaasaqalissutaasumik ilinniagaqariartorlutik Danmarkimut nunanulluunniit allanut aallartariaqartarput. Taakkuali ilarpassuisa Kalaallit Nunaannut utertannginnerat ajornartorsiutaavoq. Maannakkorpiaq Kalaallit 3000-init amerlanerit Kalaallit Nunaanni piumaneqartunik ilinniagaqarsimasut Danmarkimi najugaqarput. Taakkua angerlamut nuunnginnissamut pissutaasutut ilaatigut suliffeqarnermi qaffakkiartornissamut periarfissanik, paaqqinnittarfinnik atuarfinnillu pitsaasunik amigaateqarneq nalunaarpaat.

Politikerinit partiimut sumut ataneq apeqqutaatinnagu, immikkut ilisimasalinnit inuiaqatigiinnilu oqallissaarisartunit tamanit ataaseq isumaqatigiissutigineqarpoq. Kalaallit Nunaata siunissanut ilinniagaqarneq matuersaataavoq. Ajornaatsumik aaqqiissutissaqanngilaq! Ilungersorluni sivisuumik sulineq meeqqat atuarfiannik nunat tamalaat akornanni qaffasissusilimmik pilersitsinermik aallartissaaq. Meeqqat atuarfiat inuusuttut avammut aallarlutik nunarsuarmi ilisimatusarfinni pitsaanerpaani ilinniagaqarnissaannut, Kalaallit Nunaannit aallartitanngornissaannut nunarsuarmi atassuteqarfinnik pilersitsinissaannut tunngavissaavoq. Meeqqat atuarfiat ulluuneranilu paaqqinnittarfiit ingerlalluarpata inuusuttut angerlarusunnerusupput, ilaquttanik pilersitsillutik Kalaallit Nunaallu silassorinnerulersillugu inuiaqatigiillu sanarfineqarnerannut tapertaalerlutik.