Ilinniagaqartut ulluannut peqataasorpassuit
Atlantikup avannaamiuisa ilinniartuisa ulluannut tallimanngorpat ingerlanneqartussamut peqataaniartut 130-it nalunaarsimapput. Taakkua savalimmiormiut kalaallillu ilinniakkaminnik naammassinnissimasut nunaannut qanoq angerlartinneqarsinnaanerat oqallisigissavaat.
Ilinniagaqartut isumasioqatigiinnissaat aqagu tallimanngorpat pissaaq, Christiansborgip Landstingssalen-iani nalunaaqutaq 13-imiit 17-imut. Nunanit taakkunanit pisasuusunit kalaallit savalimmiormiullu Danmarkimiittut qanoq pitsaanerpaamik atorneqarsinnaanerat pillugu apeqqutit oqallisigineqarnissaannut danskit kalaallillu politikerii oqalliseqataanissamut qaaqquneqarsimapput.
Isumasioqatigiinnerup immikkoortuata siulliani Aningaasaqarnermut minister Lars Løkke Rasmussenip Venstre-neersup, folketingimi ilaasortap Julie Rademacherip Socialdemokraterne-neersup aamma Line Barfodip Enhedslisten-imeerup qulequtaq danskit isaannik isigaluigu oqaluuserissavaat. Lars Løkke Rasmussen - Danmarkip statsministeriata kingoraartigissagunagaa - savalimmiormiumik nuliaqarpoq, Julie Rademacher Socialdemokraterne-neersoq kalaallinit kingoqqisuulluni. Taamaattumik danskit politikeriinik oqalliseqateqarneq ilinniartorpassuarnut atlantikup avannaamiunut assut iluaqutaallunilu soqutiginaateqarluarumaartoq, aaqqissuisuniit taamak naliliipput.
Isumasioqatigiinnerup immikkoortuata aappaani kalaallit savalimmiorniullu politikerii namminersortumillu inuussutissarsiortuusut saqqummiissapput. Tassani Torshavnip borgmesteria Sermersooq kommunillu borgmesteria Heðin Mortensen aamma Asii Chemnitz Narup (IA) inussuttut qanoq ilullugit angerlartinneqarnissaaneranut siunnersuutissaqarput. Aamma peqataassapput Nuummiit Svend Hardenberg aamma Torshavnimiit Christian Nagata. Taakku marluk namminneq Danmarkimi ilinniagaqartuusimasut ilinniakkaminnik naammassinninnermik kingorna angerlanerminni namminneq misilittakkatik oqaluttuarissavaat. Isumasioqatigiinnermi inerniliussat Atlantikup Avannaamiut Suleqartigiiffianni katersorneqassapput suleqatigiillu nittartagaannut dnag.dk-mut inissinneqassalluni.