Ilinniaqarnersiutit utertillugit
Inuusuttut inatsisartuanni Naasunnguaq Olesenip siunnersuutigaa ilinniagaqarnersiutit ilaat utertinneqartassasut, ilinniakkamik naammassinninnerup kingorna Kalaallit Nunaata avataani sulilissagaanni.
Naasunnguaq Olesen Sisimiuni ukiup aappassaa HTX-imi ilinniagaqarpoq. Inuusuttut inatsisartuanni aalajangiivigisassatut siunnersuutigaa Naalakkersuisut suliniutigissagaat annertunerusumik ilinniagaqarfinni ilinniartut ilinniagaqarnersiutimik procentiata ilaa utertittassagaat, tamakkua ilinniagaqarnerminnik naammassinninnermik kingorna Kalaallit Nunaata avataani sulilissappata.
- Anguniarpara inuusuttutut landskarserput atornerlussanngikkipput. Ilinniagaqarnerput naammasigutsigu aamma nunamut iluaqutaassaagut, Naasunnguaq Olesen oqarpoq.
Ilisimanngilaali aningaasat imaluunniit aningaasaliissutit qanoq amerlatigisut utertinneqartassanersut.
- Inuusuttut allat eqqarsaatissikkusuppakka qanoq amerlatigisut landskarsimut utertinneqartassanersut. Assersuutigalugu 100.000 kotuuninik ilinniagaqarnersiuteqarsimagaanni taakkua 2 procentiat utertinneqarsinnaapput. Taava inuiaqatigiinni sanngiinnerit aningaasat tamakkua iluaqutigisassagaluarpaat, Naasunnguaq Olesen oqarpoq.
Taassuma erseqqissaatigaa inuusuttut nunani allani universitetini ilinniagaqarsimasut nunanilu allani sulerusuttut ataqqillugit. Tassami tamarmik taamaasiorsinnaatitaapput.