Ilinniarfissamut siunnersuut itigartikkaat: Sooq piffissaq kingulleq atorlugu qaqinneqarpa?
Demokraatineersoq Nivi Olsen siunnersuuteqarpoq misissuisoqassasoq Ilulissani takornarialerinermut ilinniarfimmik pilersitsinissamut tunngavissat pillugit. Siunnersuut IA-mi oqaaseqartartumit sakkortuumik isornartorsiorneqarpoq. Taanna isumaqarpoq misissuititsinissaq inissaminiinngitsoq, Campus Kujalleq takornarialerinermik ilinniarfiusinnaammat.
Ilulissani mittarfissaq nunanit allanit tikiffigineqarsinnaasoq ukiualuit qaangiuppata ammassaaq, neriuutigineqarporlu takornariat illoqarfimmut tikittartut amerlissasut.
Taamaammat misissorneqartariaqarpoq illoqarfimmi ilinniaqqiffiusinnaasumik, serviceøkonomitut, arktisk turistguidetut aamma adventure guidetut ilinniarfiusinnaasumik pilersitsinissamut tunngavissaqarnersoq, Inatsisartuni ilaasortaq Nivi Olsen (D) siunnersuuteqarpoq.
- Ilulissani takornariaqarneq aallaavigalugu ilinniartoqarfimmik pilersitsineq, illoqarfimmi takornarialerinikkut sulisussanik pisariaqartitsinerpaasartumi inissisimassaaq. Tamanna pitsaasunik malitseqassaaq, Nivi Olsen tunngavilersuivoq.
Siunnersuutigineqartup inatsisartuni oqaluuserineqarnerani oqallinneq sakkortungaatsiarpoq, allaat inatsisartuni siulittaasup ilaasortat torersumik oqallinnissaanik eqqaasittariaqalerlugit.
Paviasen sakkortuumik isornartorsiuisoq
IA-p oqaaseqartartuata Mariane Paviasenip oqallinneq sakkortooq aallartippaa, siunnersuummi oqaaseqaatimini sakkortuumik isornartorsioramiuk.
Paviasenip apeqquserpaa Nivi Olsen siunnersuusiunnginnermini ilumut misissuilluaqqaarsimanersoq, Campus Kujallermi ilinniakkanik, Nivi Olsenip Ilulissani aallartikkusutaanik, neqerooruteqareermat.
Paviasen aamma isumaqarpoq Ilulissani mittarfiliortitsinerup aallartilluareernerani siunnersuut qaqissallugu kingusinaarnerusoq:
- Sooruna piffissaq kingulleq siunnersuut una qaqinneqarpa? Siunnersuummi unaqqissaaq akuerineqassappat ilinniarfissamik misissuineq 2023 saqqummiunneqarpat ukioq ataasiunngitsorluunniit qaanngiutiinnartorlu mittarfik ammartussaavoq, Mariane Paviasen oqarpoq. Paviasenip ilanngullugu apeqquserpaa ilumut takornarialerisunik amerlanerusunik pisariaqartitsisoqarnersoq, takornarialerinermik suliaqartut piffissap ilaanna sulisussanik pisariaqartitsikkajummata.
Partiit allat tapersiipput
Paviasenip tunngavilersuutai Nivi Olsenip isumaqatiginngilai:
- Takornariaqarneq eqqarsaatigalugu Kujataata ukkatarineqarnera peerniarsarinngilarput. Takornarialerinermik ilinniagaqartut amerlanerpaartaat Avannaanukartarput suliffimmik misiliiartorlutik. Taava sooq inuusuttunut periarfissat amerlanerusut ammaatissanngilagut, Nivi Olsen oqarpoq.
Mariane Paviasenip assortorpaa siunnersuutip akerlerineqarnera tunngaveqartoq IA-p avannaani ilinniarfeqartitserusunnginneranik.
IA-p oqariartuutai partiinit allanit aamma isumaqatigineqanngillat. IA-p naalakkersuisuutitaqartuisa Siumup, IA isummatigut aamma akerlilerpaa.
S: ilinniaqqiffissat amerlanerusut pisariaqartippagut
Politikkimut tunngasunik oqaaseqartartoq Doris J. Jensen (S) oqarpoq Ilulissani ilinniaqqiffiusinnaasumik pilersitsinissamut misissuinissamut isumaqataalluni.
- Mittarfissuaqalingajalerpoq, ukiorlu kaajallallugu takornariaqartarnissamut periarfissaqarluartitsisussamik. Ilinniagaqartut amerlanerusut pisariaqartippagut, amerlanerusullu ilinniagaqalissappata ilinniaqqiffissat amerlanerusut pisariaqartippagut, Doris J. Jensen oqarpoq.
Siunnersuut IA-mit ilalerneqanngikkaluartoq, Siumumit ilalerneqarpoq. Siunnersuutillu aappassaaneerneqannginnerani ataatsimiititaliami suliarineqartussanngorlugu ingerlateqqinneqarpoq.