Ilinniarfiup pisortaata Kielsen naqqippaa
Danmarkimi ilinniartitsisunngorniarfimmi ilinnialernissap Nunatsinnit ajornannginneruneranik Kim Kielsenip oqaaseqarnerata, Ilinniarfissuarmi pisortaq, Britta Lohmann qisuariartippaa.
Kim Kielsenip Sermitsiaq.AG-mi apersorneqarnermini, ilinniartitsisut amigaatigilerneqarnissaat pinngitsoortinniarlugu, Doris J. Jensenip Ilinniarfissuarmi ilinnialernissamut piumasaqaatit sakkukillineqarnissaannut siunnersuutaa tamakkiisumik tapersernerarpaa.
Oqaaseqarnera
- Ilinniarfissuarmi ilinnialernissamut piumasaqaatit maani Nunatsinni Danmarkimit qaffasinnerunerat iluaqutaanavianngilaq. Assersuutigalugu ilinnialernissamut maani itigartitaasut Danmarkimi ilinniartitsisunngorniarsinnaasut takusareernikuuagut, Kim Kielsen, Sermitsiaq.AG-mut taama oqarpoq.
Taamatut oqarnera Britta Lohmannimik qisuariartitsivoq, taannalu ima oqarpoq:
- Danmarkimi piumasaqaatit qaffasinnerupput, kisianni danskit ilinniarfiini ilinnialernissamut inissarpassuit inoqanngissinnaasarput, taamaalillunilu danskit ilinniartitsisunngorniarfiini ilinnialernissaq ajornannginnerusinnaasarluni. Ingammik kalaallit immikkut aaqqiissuteqarfigineqarnerat atoraanni, kalaallit ilinniartut danskit piumasaqaataannik naammassinninngikkaluarlutik ilinnialersinneqarsinnaasarmata, Britta Lohmann, ilinnialernissamut piumasaqaatinik sakkukilleerusunngitsoq erseqqissaavoq.
Immikkut akuerineqarneq
Ilinniartunik agguaqatigiisillugu 5,5-mik karaktereqanngikkaluanik ilinnialersitsinissamut ullumikkut periarfissaqartoq, taassuma oqaatigaa, kisianni tamanna immikkut akuerineqarnissamik piumasaqaatitaqarpoq.