Ilinniarsimanngitsunut kursusertitsisalernissaq pillugu siunnersuut suli naammassineqanngilaq
Meeraaqqeriviit, meeqqeriviit, sunngiffimmi ornittakkat, najugaqaqatigiiffiit, inuit innarluutillit ikiortariallit, utoqqaat illui allallu ulloq unnuarlu angerlarsimaffiit ilinniarsimasunik sulisussaaleqiffiupput. Kommuneqarfik Sermersooq politikkikkut ataqatigiissaarisoqatigiinnut siunnersuuteqarpoq sulisut "assaat kissalaartut" ilinniarsimanngitsut kursusertinneqartalissasut.
Erseqqissaat: Allaaserisaq paasineqarsinnaavoq politikkikkut ataqatigiissaarisut ataaatsimiinneranni Qaqortumi sapaatip akunnerani matumani ingerlanneqartumi "assaat kissalaartut" suliffissaqanngitsut ilinniarsimanngitsullu ilinniarfiit susassaqartut aaqqissugaannik pikkorissarneqartarnissaannik siunnersuut ataatsimiinnermi eqqartorneqarsimasoq.
Allaaserisap saqqummereernerani aaqqissuisoqarfik ilisimatinneqarpoq Qaqortumi ataatsimiinnermut tunngatillugu paasissutissanik pissarsiniarnitsinni politikkikkut ataqatigiissaarisoqatigiit februarimi ukioq manna ataatsimiinnerannit imaqarniliaq matumani pineqartoq.
Naalakkersuisut siulittaasuata naalaakkersuisoqarfiani pisortaq, Hans-Peder Barlach Christensen, nassuiaavoq, oqaaseqaat matumani issuarneqartoq tassaasoq atorfilittat politikerinut oqaaseqaataat. Politikerit 16. februar Sisimiuni ataatsimiinnerminni aalajangigaat tassaavoq "assannut kissalaartunut" najugarisaq qimannagu pikkorissaanerup annertusarnissaanut periarfissaq misissorneqassasoq aammalu Isumaginninnermut, Suliffeqarnermut Nunamullu Namminermut Naalakkersuisup aamma Meeqqanut, Inuusuttunut Ilaqutariinnut, Peqqissutsikkullu Naalakkersuisup kiisalu Ilinniartitaanermut, Kultureqarnermut, Timersornermut Ilageeqarnermullu Naalakkersuisup suliaq oqallisigissagaat.
Suliffissaaleqisut ilinniarsimanngitsullu pikkorissartarnissaat pillugu suliaq suli naammassineqanngilaq
Meeqqerivinni, meeraaqqerivinni, najugaqarfeqatigiinni allanilu ulloq unnuarlu angerlarsimaffinni ilinniarsimassutsikkut qaffassaasoqarnissaa pisariaqartinneqarpoq. Taamaammat Kommuneqarfik Sermersooq siunnersuuteqarpoq kommunit akimorlugit aammalu Naalakkersuisut suleqatigalugit ataatsimoorluni iliuuseqartoqassasoq, siunnersuutip killiffia politikkikkut ataqatigiissaarisoqatigiit Kujallermi sapaatip akunnerani matumani ilisimatitsissutigineqarpoq.
Tassungalu atatillugu Kommuneqarfik Sermersooq Naalakkersuisut atorfilittaannit uparuarneqarpoq:
- Isumassuinermut tunngasunik suliffeqareerpoq, taakkulu sivikillisaavigineqarnissaat
annertusarlugu ineriartortittuarneqarput. Pisartut takutippaat, Peqqissaanermik Ilinniarfimmi aamma Perorsaanermik Ilinniarfimmi periarfissat Kommuneqarfik Sermersuup atunngikkai, Naalakkersuisut uparuaapput naggasiutigalugulu kaammattuuteqarlutik Kommuneqarfik Sermersooq qitiusumik ilinniarfiit nittartagaanni periarfissat pillugit misissueqqullugu.
Taamaalilluni Kommuneqarfik Sermersooq Naalakkersuisut atorfilittaannit tapersersorneqanngilaq, naak sulisinnaasut ilinniarsimanngitsut pillugit iliuuseqartoqarnissaanik ujartuisoqartaraluartoq, ilaatigut pikkorissarnerit aqqutigalugit ilinniarsimanngitsut piginnaasamikkut qaffassarnissaat periarfissaqarnerulerseqqullugit ujartuisoqartaraluartoq.
Sulilersitsinissamut sulisullu suliinnarnissaannut periarfissat pitsaanerusut
Kommuneqarfik Sermersooq politikkikkut ataqatigiissaarisoqatigiinnut innersuussigaluarpoq Naalakkersuisunut inassuteqartoqassasoq ilinniarfiit attuumassuteqartut 2023-miit siunissaq ilanngullugu pilersaarusiussasut "assaat kissalaartut" ilinniarsimanngitsut sulisooreersut aammali inulerisutut sulilernissaminnut piukkunnaatillit pikkorissartinneqartalernissaat ataqatigiissaarneqassasoq, tamatumalu saniatigut ilinniarsimasut qaffassarnissaminnut periarfissaat annertunerulersinneqassasoq.
Siunnersuummi siunertarineqarpoq utoqqarnik, innarluutilinnik, tarnimikkut erloqissutillit sullinneqarnerannut aammalu ulluunerani paaqqinnittarfinnut pikkorissartitsinerit sammitinneqassasut.
Tassami nunatsinni kommunit "assannik kissalaartunik" annertuumik amigaateqarput, nunatsinnilu sulisinnaasut affaasa missaat ilinniarsimasuunatik.