Ilinniarsimassutsip qaffasissusaa suli qaffakkiartorpoq - arnat siuttuupput
Innuttaasut meeqqat atuarfiannit qaffasinnerusumik ilinniagaqarsimasut ukiut kingulliit qulit ingerlaneranni 9,2 procentpointimik qaffassimapput.
2020-mi innuttaasut 16-it 74-illu akornanni ukiullit 42 pct.-ii meeqqat atuarfiannit qaffasinnerusumik ilinniagaqarsimapput. Ukiut qulit matuma siornatigut innuttaasut 33 procentiinnaai taamatut ilinniagaqarsimallutik, Naatsorsueqqissaartarfik nunami ilinniaqassutsip qaffasissusaa pillugu naatsorsusimasoq allappoq.
Arnat amerlassusaat eqqarsaatigalugu meeqqat atuarfiannit qaffasinnerusumik ilinniagaqarsimasut amerlanerupput. 2020-mi arnat 45,3 pct.-ii inuusuttunut ilinniarfinni imaluunniit ilinniaqqiffinni ilinniarsimapput, angutilli akornanni ilinniarsimasut 39,5 pct.-iusut, naatsorsueqqissaartarfimmit ilisimatitsissutigineqarpoq.
Assigiinngissut annerpaaq ilinniaqqissimasut akornanniippoq.
2020-mi arnat 16,8 pct.-ii ilinniaqqissimasuupput angutit akornanni 10,2 pct.-iusut. Ukiut qulit kingulliit ingerlanerini arnat akornanni ilinniaqqissimasut qaffannerpaajusimapput.
Kalaallit Nunaanni nunap immikkoortui assigiinngitsut misissoraanni, ilinniarsimassutsip qaffasissusaa aamma nikerarpoq.
Nuup immikkoortuani ilinniarsimassuseq qaffasinnerpaavoq. Tassani innuttaasut 57 pct.-ii meeqqat atuarfianniit qaffasinnersumik ilinniagaqarsimapput. Nunap immikkoortuini allani kisitsisit takussutissami tulliuttumi takuneqarsinnaapput:
