Ilinniartitsisoq Dronningip nersornaasiuttagaanik tunineqartoq
Thula (Tulla) Andreassen Tasiilami Alivarpimmi ukiuni 47-ni sulisimasutut Dronningip nersornaasiuttagaanik nersornaaserneqarpoq.
73-nik ukiulik Thula (Tulla) Andreassen Tasiilami Alivarpimmi ilinniartitsisutut sulissalluni ullaat tamaasa makittarpoq. Ukiuni 47-ni kingullerni tassani sulisimavoq. Atuartullu Gentoftemut atuariartortinneqartarnerannut aammalu Prinsesse Benediktemik naapitsinissaannut suliaqartutut ukiut 25-t sinnerlugit akisussaasuusimalluni.
- Maanna 73-inik ukioqaraluarluni Thula atuarfimmi teamlederitut sulivoq sunniuteqaqataajuarlunilu. Thula akisussaassuseqartuuvoq, nuannarineqarluni aalajaalluinnarlunilu. Tunumi taama sulisut pisariaqartinneqarluarput, Tasiilami Alivarpiup pisortaa Jørn Holbech allappoq.
Thula Andreassen atuarfimmi juullimut naggataartoqarnerani 17. december Dronningip nersornaasiuttagaanik tunineqarpoq.
Ilinniartitsisoq aalajaalluinnartoq
Thula Andreassen Tasiilami Alivarpimmi 1. august 1975-imi atorfinippoq. Meeqqat atuarfianni ilinniartitsisuunermini kinguaariit arlallit atuartissimavai. Atuarfiup atuakkanik atorniartarfiani aqutsisuusimavoq, atuakkanillu atorniartarfimmi sulisutut ilinniarsimalluni. Ukiut qulit pisortap tulliatut sulereerluni nammineq kissaatigisaminik 2008-mi pisortap tulliujunnaarpoq.
- Thula sulinermini atuarfiup ineriartorneranut inuiaqatigiillu ingerlanerannut tunniussaqarluarsimavoq. Atuarfiup sinniisuanni siulittaasuusimavoq, aammalu ilinniartitsisutut pisortatullu tunniusimalluinnartuulluni. Atuarfimmut sunniuteqarnera malugineqarluarsinnaavoq, ukiunilu 47-ni ilinniartitsisuunermini atuartissimasai amerlaqaat, Jørn Holbech allappoq.