Ilinniartitsisut ajorunnaarsitsisartumut qujaannartut
Qeqertarsuarmi meeqqat atuarfianni aqutsisutsuleqatigiinnermut ajornartorsiuteqarneqajorunnaarsitsisartumit aaqqivigineqarnissaatsiunnersuutigereeraallu Kommune Qeqertalimmiaaqqiagiinngitsoqalerpoq.
Qeqertarsuarmi meeqqat atuarfianni sulisut akornanni suleqatigiinnissamik ajornartorsiuteqarnerup aaqqiiviginissaa attuinnarlugit eqqarsaatilluunniit nukiga atorlugu ajorunnaarsitsisartumit aaqqivigineqarsinnaanerannik atuarfimmi aqutsisut siunnersuuteqarsimaneri kommunimi politikerip Aqqa Samuelsenip (S), Kommune Qeqertalimi borgmesterip tullersortaata aappaata, tupaallaatigaa.
– Aaqqiagiinngissuteqarnerup taama iliuuseqarfiginiarnera eqqumiilluinnarpoq – pisoq kommunalbestyrelsimi eqqartorneqaqqaarsimasariaqaraluarpoq, Aqqa Samuelsen Sermitsiamut oqarpoq.
– Qeqertarsuup atuarfiani sulisunit uppernarsarparput sulisut akornanni aaqqiagiinngissuteqarneq ajorunnaarsitsisartoq atorlugu iliuuseqafiginissaat kissaatigineqarsimasoq. Politikkikkut sivisuumik sulininni tusarsimanngisaannarpara kommunimi pisortallu suliffeqarfiini aaqqiagiinngissuteqarnerit ajorunnaarsitsisartoq atorlugu aaqqiviginiarneqarsimasut.
Paasissutissat amigaatigineqartut
– Suliffimmi aaqqiagiinngitsoqarnera pillugu ilinniartitsisut ataatsimoorlutik Imakimut kommunalbestyrelsimullu kingorna allagaqartut tusarpara. Kommunalbestyrelsimi aamma paasitinneqanngilagut, taamaammat tulliani ataatsimiilerutta qaqissavara.
– Ajorunnaarsitsisartumik atuinissap eqqarsaatigineqarsimaneraluunniit akuerineqarsinnaanngilaq. Kommune Qeqertalimmi sulisut taamannak pineqartussaanngillat, Aqqa Samuelsen naqissusiivoq.
Qeqertarsuup atuarfiani ilinniartitsisut arlallit Sermitsiap attaveqarfigai. Taakku isornartorsiuerusunngillat kisianni uppernarsarpaat ajorunnaarsitsisartumik ikiorneqarnissamik neqeroorfigineqarsimallutik. Taavalu attuinnarlugu imaluunniit eqqarsaatip nukigi atorlugit ajorunnaarsitsisartumik takkuttoqarnissaa siunnersuutigineqarsimasoq. Sulisulli akerliunerisigut tamanna pisimanngitsoq.
