Ilinniartut atanerusalerput
Kalaallit Aarhusimi ilinniagaqartut ikerinnakkut taamaatittartut ikilisarniarlugit misiliummik suliniut maanna nalilersorneqarpoq
Aarhusimi kalaallit ilinniartut akornanni uniinnartartut ukiorpassuarni aatsaat taama ikitsigipput.
Aviisi AG taama allaaserisaqarpoq.
Aarhusimi Kalaallit Illuutaanniit kisitsisit nutaarluinnaat takutippaat ilinniagaqartut 50 2018-mi uniinnarsimasut. Ukiorpassuanngortuni uniinnartut aatsaat taama ikitsigipput. Siornatitu 70-it 80-llu akornanniittarput 2011-milu amerlanerpaajugamik 90 ikerinnakkut ilinniakkamik taamaatitsipput.
Aaqqiissummi ataasiakkaaraluni oqaloqatiginnittoqartarpoq, ilinniartullu nutaat Danmarkimi ilinniakkaminik aallartilluarnissaa qulakkeerniarlugu atugarissaarnermut siunnersuisoqartarpoq.
Kisianni pitsaasumik ineriartortoqarneranut misiliutitut aaqqiissutip qanoq iluaqutaasimatiginera ersarissumik maanna oqaatigiuminaapoq.
Uniinnartarneq pillugu suliniuteqarneq AG-mi paasisaqarfigiuk. Uani ataani linki aqqutigalugu aviisimut isissutissarsisinnaavutit: