Ilinniartut Nunatsinnut angalaanngitsuulerput
Aningaasarliorneq pissutaalluni ilinniarnertunngorniat Kalaallit Nunaannut ilisimatusarlutik angalanissaraluat kinguartinneqartariaqarpoq.
Natsat qinngat ulussallu aappalaartuinnaat. Faaborgimi ilinniarnertuunngorniat qaammatip massuma qeqqani Kalaallit Nunaaliarnissaraluartik pillugu taama takorluugaqaraluarput. Pilersaarutilli unitsikkallarneqarput aningaasat aningaasaateqarfinnit tapiissutiginiarlugit neriorsuutaagaluit uterteqqinneqarsimaneri pillugit. fyn.dk taama allappoq.
Kalaallit Nunaannut angalanissaq ilinniartut 28-t sivisuumik immikkut ittumik sammisaqareernerisa inernerisussaagaluarpaa. Ilinniartut Faaborg Gymnasiami 2.g-ngoqqammipput. Ilinniartut biologi qaffasissumik ilinniarpaat ukiullu kingulliup ingerlanerani silap kissatsikkiartornera itisilerlugu sammillugu pilersaarutip "Unge Klimaforskere" ingerlanerani.
Faaborgimiut silap kissatsikkiartornerata kingunerisai namminneq isiminnik takusussaagaluarpaat aammalu ilinniartunut allanut ilinniakkaminnik siammaasussaagaluarput. Filmiliortut angalaqataasussaagaluarput kiisalu silasiortoq Peter Tanev TV2-meersoq angalaqataasussaagaluarluni.