Ilinniartut uniinnartarnerat ikilisarneqassapput

- Ilinniartoqarfigut ilinniartunut soqutiginarsartariaqarpagut. Ilinniartut ilinniakkamik aallartitsinissamut naammassinninnissamullu soqutiginnilersittariaqarpagut. Tamanna pilersinneqassaaq pittaasumik siunnersuinikkut siunissamilu ilinniartunut pittaasunik periarfissanik pilersitsinermi.

Siumut sinnerlugu Inatsisartunut qinersinissamut qinigassanngortittoq Nick Nielsen tusagassiutinut nalunaaruteqarpoq. Naalakkersuinikkut suleqatigineqartarsimasut Atassut, eqqartukkani assigiinngitsuni isumaqatigineqanngilaq.

- Pinngitsaaliineq siorasaarinerlu ilinniagaqarnersiutaarunnissamut ilinniartut ilinniartoqarfinni ingerlatsinerannik annerusumik qulakkeerinninngilaq Masauna Peary Atassummiit isummernera akerlerpara.

- Ilinniartut amerlanerulernavianngillat ilinniagaqarnersiutit qaffannerisigut, kiisalu annerusumik ilinniartup takkuttarneratigut nalunaarsuisoqassappat. Ilinniagaqarnersiutit 2005-mi qaffanneqarput taamaakkaluartoq amerlanernik ukiut tulliuttut ilinniartoqalinngilaq. Ilinniagaqarnersiutit annertussusaat ilinniartut naammassisarnerannut annerusumik sunniuteqarneq ajorpoq.

- Taamaattumik Siumumiit Masauna Peary Atassummiit siunnersuutaanut isumaqataanngilluinnarpugut.Ilinniagaqarnersiutit inuiaqatigiinni akit qaffakkiartornerat naapertorlugu ingerlasariaqarput, tamannalu akisussaaffiup iluani Naalakkersuisuugallarama aningaasaqarnermut inatsisissamut ikkunneqarnissaa timitalerlugu siunnersuutigaara. Ilinniartut kattuffiat ILI ILI qanimut suleqatigalugu siunnersuut suliarineqarpoq.

- Ilinniartoqarfinni unititsiinnartarneq annertugaluaqisoq ilinniakkamik aallartitserusunneq soqutigineqaleraluttuinnarpoq, ilinniartut amerliartornerisigut tamanna takuneqarsinnaavoq.

- Sulissutigisariaqarparput ilinniarluni unititsiinnartarnerup annikillisarneqarnissaa. Assigiinngittut ilinniartunut sunniuteqartartut iliuseqarfiginerisigut tamanna aaqqissinnaavarput. Iliusissat ilaginngilaat annerusumik takkuttarnermut nalunaarsuineq imaluunnit pinngittaaliineq.

- Pingaarutilik siulleq iliusissaq tassaavoq ilinniartut ilinniakkamik aallartinnginneranni siunnersortarnissaat. Pittaalluinnartumik siunnersuisoqartariaqarpoq inuusuttortagut aallaqqaataaniit ilinniakkamik eqqortumik toqqaanissaat qulakkeerumallugu. Inuusuttortatta fag-it pikkoriffigisatik soqutigisatillu sammingunikkit ilinniakkaminnik ingerlatsilluarnissaat tassuunakkullu unititsinngiinnarnissat naammassinissaallu qulakkeerneqassammat.

- Akisussaaffiup iluani Naalakkersuisuugallarama siunnersuisarnermut inatsisiliorsimavunga. Siunertaavoq inatsimmi meeqqat atuarfianni soraarummeereersimasut amerlanerusut ilinniakkamik aallartitsisalernissaat. Siunersuisarnermi inatsit kujataani misilittakkanik toqqammaveqarpoq, pittaasunillu kinguneqarsimalluni. Taamaattumik ukiut tulliuttut tingussaasunik angusaqarluarnissatsinnut isumalluarpunga.

- Suliniutingisama ilangisimavaat nuna tamakkerlungu ilinniartunut siunnersuisarfiup pilersinnera ilinniartunik ilinniarnerup ingerlanerani ajornartorsiortunut ikorfartuinermut periarfissiisoq. Kisitsisimmi takutippaat ilinniartut affaat ilinniarnerminni unittitsiinnartartut. Taamaattumik pingaaruteqarpoq unittitsiinnartarneq annertoqisoq akiorniorniarlungu qanimut oqaloqatingiinnermi ilinniartunullu kaammattuinikkut suliniarnissaq.

- Siunissami ilinniartoqarfitta illutaat pittaasuusariaqarput. Isumaqartupilussuuvoq ullumikkumut tulluuttunik ilinniarfeqarnissarput ilinniartoqarfiillu pittaasunik periarfissallit soorlu internet-imut akeqanngittumik isersinnaaneq eqqarsaatingalungu.

- Ullumikkumut sanilliullungu assassorluni ilinniakkamik aallartitsinissaq ajornannginnerusariaqarpoq, annertuumik unammillingassaqarpungut praktik-erfissarsiornerit eqqarsaatingalungit. Taamaattumik assassorluni ilinniarnerit aaqqissuuteqqinneqassapput. Ajornannginnerusariaqarpoq praktik-erfissarsiorneq praktik-erfissallu amerlanerusariaqarput. Pisortat pittaanerusariaqarput inuiaqatingiinni aningaasarsiornerup tamakkiisumik isiginissaanut suliassanik suliariumannittussarsiornermi agguaassisoqartillungu. Akikinneq kisimi sanaartukkanik neqeroortoqartillungu aalajangiinermi toqqammaviussanngilaq, suliassat agguaanneqartillungit ilinniartitaanerup inerisarneqarnissaa praktik-erfissaqarnikkut isiginiarneqarnissaa qulakkeertariaqarpoq.

Taakkartorneqartut allanngortinnerisingut inuusuttortatsinnit ilinniarusulersitsineq ilinniakkanillu naammissinninnissamut aqqutissiussineq qulakkeerneqarlunilu pilersinneqassaaq, Nick Nielsen allappoq.