Ilisimartusarfik nutaaliaalluinnartoq atoqqaarfissiorneqarpoq

Nunarput ilisimatusarfimmik nutaaliaalluinnartumik pisuunnguallappoq.

Isumaginnermut, Ilaqutariinnermut, Naligiissitaanermut, Inatsisinillu Atuutsitsinermut Naalakkersuisoq, Sara Olsvig (IA) Pinngortitalerinermik Ilisimatusarfiup aamma Kalaallit Nunaanni Peqqissusermik Ilisimatusarfiup illutassaata nutaap pisortatigoortumik pingasunngornermi atoqqaartippaa.

Illorsuaq nutaaq 1.500 kvadratmeterinik angissuseqarpoq, ininik ilinniartitsiffiusartussanik, misissuisarfinnik, inunnik misissuisarfinnik, tikeraanut inissianik arfinilinnik mikisunik inunnullu 24-inut naatsorsuussanik allaffilersugaalluni, Pinngortitaleriffik tusagassiuutinut nalunaarummi paasissutissiivoq.

- Misissuisarfiit anngajaarsuit marluk atortorissaarluinnartut Pinngortitamik Ilisimatusarfimmi ilinniartitsiffiusartussatut atorneqassapput, aammalu init ilinniartitsiffiusartussat attaveqaasersornermi nutaaliaalluinnartunik atortulersugaanertik peqqutigalugu nunarsuarmit sumiiffinnit tamaniit - aamma nunatsinniit nunanut allanut - toqqaannartumik ilinniartitsisoqarsinnaasassaaq, naak ilinniartut Nuummiiginnaraluartut, tusagassiuutinut nalunaarummi erseqqissarneqarpoq.

Illorsuaq isersimaffigalugu qaamasoq, nuannersunik nipigissagaalluartunik initalik kusanartunillu pequsersugaasoq ilinniarfigilissallugu suliffigissallugulu kajuminnarluinnartuuvoq.

Illorsuaq atulersoq Kalaallit Nunaanni suliffeqarfinnit sananeqarpoq, Illussanik titartaasarfik TNT Nuuk siunnersortaalluni, Permagreen sanaartortuulluni Pinngortitaleriffillu sanatitsisuulluni. Illorsuaq tamarmi sananeqarluni atortuilu tamakkivillugit 55 mio. missaanni akeqarpoq.

Allaaserisap ataani atoqqaarfissiuinermit assit takukkit