Ilisimasallit nunatsinnit nussornerat pillugu Naleraq isumaqarpoq: Inuiattut kinaassuseqarneq ersarissoq nunatsinniikkusussuseqartitsissaaq

Ukiuni 40-ni, nunarput qallikkut isikkoqarpoq namminiilivikkiartuaartutut, kisiannili piviusoq tassaavoq danskit aaqqissuussaanerannik ilaarsinikkut inuiattut ingerlaniarsarisoqartoq, taamak isumaqarpoq Pele Broberg:

- Inuiaqatigiittut nammineq kinaassuseqanngilagut. "Tassaaginnarpugut" danskit naalagaaffianni innuttaaqataasut taamaammallu ukiuni 40-ni danskit aaqqissuussaanerannut naleqqussaannarnikuuvugut ilaarsiinnavinnikuullutalu uffa inuiattut kinaassusilittut katersuuffigisassatsinnik nammineq ilusilersuisussaagaluarluta, namminerlu imminut aqukkusussuseqartussaagaluarluta, taamaattoqarneratalu ajoraluartumik kingunerisaasa ilagaat inuiaqatigiinnik nukittuunik pilersitseqataarusussuseerukkiartorneq, taannalu aqqutigalugu innuttaasorpassuit annaanikuuagut, pingaartumik Danmarkimut, Pele Broberg tikkuaavoq nangillunilu:

- Taamaammanuna immitsinnut nukillaarsalersartugut, uagut nammineq najugaqariaatsitsinnut naleqquttumik aaqqissuussinngilagut, nunami siammarsimanerput aamma inuiattut kinaassusulittut kulturilittullu pingaartitsinissaagaluarput amerlasuutigut maangaannartarpoq. Assersuutigiinnarlugu innuttaasoq nunaqarfiit illoqarfiilluunniit arlaanniittoq nammineq illuliorusukkuni inuunermillu naleqarluartumik pilersitserusukkuni, allamik aqqutissaqanngilaq allaffissornerujussuup iluani sulissutigerusutani tamaviaarutigisariaqassavaa, nunaminertannguaq illuliorfigerusutani piinnarlugu. Tassami aaqqissuussaanerput taamak pisariutigaaq, aaqqissuussaaneq nunani allani ilisimaneqartoq aammalu inunnik millionilikkaanik innuttaqartunut naleqqussagaq nunatsinni atorniarsarigatsigu.

Qanoq qalipaateqarneq pineqanngilaq

Pele Broberg erseqqissaavoq "inuiattut kinaassuseq ersarissoq" pillugu ujartuinerminni ammip qalipaataa pineqanngimmat:

- Inuiattut ersarissumik kinaassuseqarnissamik ujartuinerput amerlasuutigut ammip qalipaataanik immikkoortitsiniarnertut sangutinneqartarpoq, arlaannaatigulluunniilli ammip qalipaataa pinikuunngilarput, nunamulli ilumoorluni attuumassuteqarusunnermut tunngassuteqarpoq, tassungalu tunngatillugu danskit naalagaaffiata inuiaqatigiit kalaallit Inuttut akuerinikuuai, Pele Broberg (N) erseqqissaavoq.

Pele Broberg aamma tikkuaavoq, innuttaasut nunatsinni najugaqarusukkaluartut, pinngitsaalineqartutut, tassa allatut iliorsinnaajunnaartutut misigalutik nunarput qimattaraat, taakkunanngalu amerlasuut aningaasatigut artorsarnertik pissutigisaraat, isumaqarsimasinnaasarlutillu Danmarkimut nuukkunik nunatsinni najugaqarnermut sanilliullugu aningaasarissaarnerullutik atugarissaarnerullutillu inuusinnaassallutik.

- Taamaammanuna inuiattut aaqqissugaanerput uagutsinnut, nunap innuttaanut naleqqussagaasariaqartoq, arlaatigut inuuniarnikkut ajornartoornermi aaqqissuussaanitsinni akorsisinnaassuseqarluartariaqartugut ikiuussinnaallutalu innuttaasunut pisariaqartitsisunut, taamaaliornikkullu namminneq imminut napatissinnaaqqinernissaannut aqqutissiuussisinnaassuseqartariaqartugut, innuttaasut allamut nuuttariaqalersutut misigisimannginneranni, Pele Broberg Sermitsiaq.AG-mut oqarpoq.

Nunatsinni inuuniarneq akikinnerusariaqarpoq

Pele Broberg-ip pingaartillugu tikkuarpaa nunatsinnit aallarlutik nunanut allanut nuttartut tamarmik qimaasutut nuunneq ajortut.

- Qanorluunniit ikkaluarpat innuttaasut tamarmik kiffaanngissuseqartariaqarput qaqugukkulluunniit aammalu sumiluunniit najugaqarnissaminnut, sumiluunniit inoorusukkunik kiffaanngissuseqassapput. Taamak kiffaanngissuseqartitsinitsinni ilisimaligaasigut inuiattut iluaqutissinneqassaagut, Pele Borberg oqarpoq nangillunilu:

- Eqqaamaannassavarput nunatsinnut angerlarususseqarluarnissaat ajunngitsumik isumagisassarigatsigu, tassanilu aamma inuiattut ersarissumik kinaassuseqarneq aammalu nunatsinni innuttaarususseqarneq pingaaruteqartuupput.

Pele Broberg assersuuteqarpoq ilinniarsimasut ilinniarsimanngitsullu SIK malillugu akissarsiaqartut inuiaqatigiinnik aningaasarsiornikkut qajannaallisaaqataasut annertuumik kinaassutsitsinnut pingaaruteqartuusut, naak ilaatigut politikkikkut oqallinnermi qaangiinnagaasutut misigisimatinneqartaraluarlutik. Tassa suut ingerlanerlunnersut amerlasuutigut eqqumaffigineqartorujussuusarput ingerlalluartullu nersualaarnagit qaangiataaginnarneqartarlutik, uffa inuiaqatigiinnut pingaarutilimmik kivitseqataasut, Broberg isumaqarpoq.

Aaqqissuussaanermik ilaarsitunersuaq pisarissersuisitsivoq

Inuiaqatigiinnut pisariinnerusumik aaqqissuussaalernissamut unammillernartut iliuuseqarfigineqartariaqartullu naammassiniagassat arlaqartut Pele Broberg isumaqarpoq.

- Pisortat matorpassualersorlutik ingerlatsinerat pisariinnerulersinneqartariaqarpoq. Nunatsinni innuttaaneq pisariinnerulersinneqartariaqarpoq. Naggataatigullu minnerunngitsumilli aamma nunatsinni inuuniarneq akikinnerulersinneqartariaqarpoq. Pisortat ingerlatseqatigiiffissui timitalimmik iliuuseqarfigisariaqarpagut, taakkumi namminersorluni nunatsinni pilersitsiniarnermut akimmiffilersuiinnanngillat, aammali nunatsinni inuuniarnermut akitsorsaataaqataalluinnarput, Naleqqap siulittaasua Pele Broberg tikkuaavoq.

Naggataatigullu taanna tikkuaavoq pingaartumik akileraartarnikkut aaqqissuussaanermik pisariinnerusumik naleqqunnerusumillu nunatsinni innuttaasut isumannaarunneqartariaqartut, tassani aamma ilanngaatit paasiuminaatsut putoqqutaarneqarsinnaasullu iluarsaassiffigineqartariaqartut.

- Sangujoraartumik ingerlatsineq aammalu minnerunngitsumik politikkikkut nuannareqqusaarluni suliniutit akisoorsuit nunatsinnik aqutsisinneqartariaqanngillat, ilaatigut innuttaasut akiligaannik pisortat aalisariartuusisarnerannik innuttaasut misigisimatinneqartarnerat tassunga killeqartariaqarpoq, ilaatigut toqqaannartumik toqqaannanngitsumillu akileraarutitigut innuttaasunut aallertarnikkut, Broberg tikkuaavoq.