Ilisimasarsiortoq piteqqami ajunaartoq
Tuluk sermersuarmi arfininngormat ajunaarpoq ilisimasassarsiortut piteqqamit pakasarneqarmata
Tuluit inuusuttut pingasut tunumi Isortumiit Kangerlussuarmut sermersuarmik itiviiniartillutik piteqqamit sapilersinneqarput. Oqquiffissarsisinnaasimanngillat. Angut 30-nik ukiulik qiulluni ajunaarpoq angalaqataalu qerussorsimagaluarlutik annapput.
- Ajornartorsiortoqarneranik kalerrinneqarpugut arfininngornermi ullaap tungaa aqqaneq qaangilaaraa. Kisianni suli piterarmat ornigussinnaasimanngilagut, politimestereqarfimmi vicepolitikommissær Poul Petersen Sermitsiaq.AG-mut oqaluttuarpoq.
Qulimiguulik S-61 Kangerlussuarmiit Narsarsualiartinneqarpoq qatsuuminiariartorlu tassangaanniit annaassiniaatinneqarluni.
- Nakorsaq politeerlu Kulusumut aasinnarlugit ajornartorsiortut orninneqarput. Annaassiniartulli apuummata angut 30-nik ukiulik qiulluni ajunaareersimavoq. Ilai marluk inussamikkut qerussorsimasut annaanneqarput, Poul Petersen oqarpoq.
Allat navianartorsioqataapput
Tuluit taakku marluk Hotel Ammassalimmut inissinneqarallarput tuluillu Københavnimi aallartitaqarfiat suleqatigalugu angerlartinnissaat aaqqissorneqarpoq.
Tuluilli taakku pingasuk sermersuarmi kisimik navianartorsiunngillat. Ilisimasarsiortut quliusut aamma sermersuarmik itiviinniartut navianartorsiorsimapput.
- Taakkuli illuikkiorlutik oqquiffissarsisimapput. Ilisimasarsiortut taakku attavigivagut. Taakkuli ungasippallaarnertik aammalu piterarnerani nikeriarsinnaannginnamik ikiuussinnaasimanngillat, Poul Petersen oqarpoq.
- Angutit inuusuttut pingasut piffissaagallartillugu illuikkiorsinnaasimanngillat. Tamanna iluatsissimasuugunikku immaqa piteraq anigorluarnerusimasinnaagaluarpaat, Poul Petersen oqarpoq.