Ilisimatusarfik nutaamik pisortassarsiorpoq
Henriette Rosingip Ilisimatusarfimmi pisortatut tunuarnerata kingorna Ilisimatusarfik marsip aallaqqaataani pisortassarsiortussanngorpoq.
Ilisimatusarfik Henriette Rosingip ukiuni arfinilinni pisortaareerluni tunuarnerani taarsiisussamik pisortassarsiorpoq.
Ukiuni pingasuni killileriikkamik atorfinitsitsisoqassaaq sivitsuinissamut periarfissalimmik, ilisimatusarfiullu atorfik marsip aallaqqaataani 2024-mi inuttalerneqarnissaa kissaatigaa.
- Angusaqarnissamik pingaartitsisumik ilisimatusarfimmi pisortassarsiorpugut, tatigeqatigiissitsisinnaalluni akuersaartumillu tunngavilimmik aqutseriaaseqarluni Ilisimatusarfiup allaffissornikkut ilisimatusarnikkullu sulisui peqatigalugit sammiviliisinnaassuseqarlunilu naammassinninnissamut aqqutissiuisinnaasumik, atorfimmut inuttassarsiuussinermi allassimavoq.
Allaffissornikkut ingerlatsilluarnissaq kiffartuussinermilu aaqqissuussaaneq ineriartorfiusoq aamma Ilisimatusarfiup aqutsisuinik, instituttiinik, sulisuinik, ilisimatusartuinik ilinniartuutaanillu ikorfartuisutut ingerlanissaa ilisimatusarfimmi pisortap akisussaaffigaa.
Ilisimatusarfiup pisortaata rektori qullersarigaa, aammalu ilisimatusarfiup pisortaa, rektori instituttinilu pisortat peqatigiillutik ilisimatusarfik aqukkaat, oqaatigineqarpoq.