Ilisimatusarfiup siulersuisuini ilaasortat nutaat
Naalakkersuisut Ilisimatuarfiup siulersuisuini ilaasortassanik nutaanik toqqaasimapput.
![Ilisimatusarfiup siulersuisuini ilaasortat nutaat](https://image.sermitsiaq.ag/279735.webp?imageId=279735&width=960&height=504&format=jpg)
Ilisimatusarfiup siulersuisui ukiuni sisamani atuuttussatut toqqarneqartarput, inuttaappullu sulisut sinniisui tallimat avataaniillu ilaasortat arfinillit. avataanit ilaasortat Naalakkersuisunit toqqarneqarput.
Ilaasotat marluk piffissami 2016-2020-mi ilaasortaapput, ingerlaqqillutillu. Tassaasut Savalimmiuni Universitetimeersoq professori Malan Marnersdóttir aamma USA-mi Dartmouth Universitymeersoq professori Ross Virginia.
Siulersuisuni ilaasortanngortut nutaat sisamat, Naalakkersuisunit toqqarneqartut tassaapput:
Svend Hardenberg, Pisortaq
Karsten Høy, Pisortaaneq
Randi Vestergaard Evaldsen, Pisiortornermi pisortaq
Suzanne Møller, institutimi pisortaasimasoq rektoriusimasorlu
Siulersuisut ukiuni sisamani atuuttussanngorlugit toqqarneqarput, aggustillu aallaqqaataani sulilernissaminnut piareerlutik, Ilinniartitaanermut Naalakkersuisoq toqqaanermut atatillugu oqarpoq:
- Inuiaqatigiit akuuffigisatta ineriartornerat suliassatigut piginnaasatsinnik suli annertunerusunik piumasaqarfiugaluttuinnarpoq, tassani inuusuttortavut ilinniarsimasut inuiaqatigiit pitsaasumik iluanaarutaasumillu ineriartortinneqarnissaannut pisuussutitta pingaarnerit ilagivaat. Taamaattumik Ilisimatusarfiup tunniusseqataaneratigut inuiaqatigiit iluanaarutaasumik suli ineriartortinneqarnissaat qilanaarivarput.
- Ilisimatusarfiup siulersuisui sulilluarnissaannik kissaappakka, aamma qinigassanngorteqqissimasut nutaanillu ilaasortanik ilaneqarnerisigut qularutiginngilara, Ilisimatusarfiup ineriartorneranik suliaqarnerup ataavartuunissaa siulersuisunit suli qulakkeerniarneqassasoq, Ilinniartitaanermut Naalakkersuisoq Ane Lone Bagger oqarpoq.
Suliaqarsimanermut qujanaq
Naalakkersuisup ilaasortaajunnaartut aamma qujaffigai:
- Siulersuisunut ilaasortaasimasut annertuumik siumullu isigisumik suliaqarsimanerannut qutsavigerusuppakka. Ilisimatusarfik taamaallaat ukiut 10-t missaanniittut ingerlaneranni soraarummeersut amerlassusaannik marloriaatinngortitsisimavoq tamannalu annertuumik suliaqarsimanermut takussutissaavoq tulluusimaarutissaallunilu, Bagger oqarpoq.
Siulersuisuni ilaasortaajunnaartut tassapput:
Professori Minik Rosing, siulittaasoq (Københavns Universitet)
Cand. phil. Karo Thomsen Fleischer, siulittaasup tullia (Perorsaanermik Ilinniarfik / SPS Ilulissat)
Prodekan Anne Marie Pahuus (Aarhus Universitet)
Tuniniaanermi pisortaq Malik Hegelund Olsen (Royal Greenland A/S)