Ilisimatusartoq: Qaamaneq eqqumiitsoq rakettimik aallartitsinermit pilersimassangatinneqarpoq
Avannaani qilammi qaamaneq takuneqarsimasoq rakettimik aallartitsinerup kingunerisaanik pilersimassasoq ilisimatusartoq naliliivoq.
Ataasinngornerup unnuaani Kalaallit Nunaata qulaani qilammi spirali angisooq Kangerlussuarmiit avannamut Qaanaamut takuneqarsinnaavoq.
Københavnip Universitetiani Niels Bohr Institutimi sulisut Sermitsiaq.AG-p aperivai tamanna qanoq nassuiarneqarsinnaanersoq.
Rakettimik aallartitsineq pissutaasinnaasoq nassuiaataavoq.
Peter Laursen, Center for Cosmic DAWN Centerimi ilisimatusartuullunilu paasissutissiinermut akisussaasoq, taama ilisimatitsivoq. Københavnip Universitetiata aamma Danmarks Tekniske Universitetip (DTU Space) avataarsuanik misissuisarfiata suleqatigiinneratigut centeri pilersinneqarpoq:
Ikummatissameersimasinnaavoq
- Qularnanngitsumik rakettip aallariarneraniussaaq, aallariarnerup aappaa siullermit minutsialuinnarnik nikingasarmat, taamaattumillu raketti aallartitsivimminit ungasinngilaq, nalinginnaasumimmi ækvatorip eqqaaniittarpoq.
- Aallariarneq taamaattoq amitsumik sulloqarpoq, kvælstoffimik imerpalasumik silaannarmut serpartaasartumik, tamannalu ingerlaarfimmik ilusinitsitsisinnaavoq, soorlu timmisartutut. Ingammik SpaceX-ip rakettiisa aallariarneri (...) aamma russit rakettiisa ilaat — ingerlaarfii spiralinngortarput, Peter Laursen allakkatigut akissummini allappoq.
Innuttaasut arlallit spirali takusimavaat, tamannalu Facebookimi isumaliutersuutinik pilersitsivoq. Innuttaasut arlallit isumaqarsimapput USA-mi SpaceX-ip rakettianik aallartitsineq pissutaasinnaasoq, tassanilu ilisimatusartoq isumaqataavoq.