Ilisimatusartut: Ilisimasat pitsaanerusumik avitseqatigiiffigineqartarnerisigut avataanit siunnersorteqartarneq annikillineqarsinnaavoq
Ilisimatusartut, ilisimasaqarfiit aamma ingerlatsivinnit suliffeqarfinniillu sinniisuutitat tallimanngorpat ilisimasat pillugit suleqatigiinnerusinnaaneq oqaloqatigiissutigissavaaat. Anguniagaavoq avataanit siunnersortit sulisinneqartarnerannut taarsiullugu kalaallit ilisimatusartarnerisa salliutinneqartalernissaat.
Ilisimatusartut, innuttaasut, ingerlatsiviit suliffeqarfiillu ataatsimoorlutik ilisimasassatut pisariaqartinneqartut suussusersiniassavaat ilisimalikkanillu nutaanik atorluaanerunissaq qulakkeerlugu. Tamanna pissaaq oktobarip aallaqqaataani nalunaaqutaq 13.00-imiit 16.00-imut isumasioqatigiinnermi.
Ilisimatusarnikkut suliffeqarfiit naammassisaqarnerulersinneqarlutillu suliffissanik pilersitsisoqarsinnaavoq, tassa ilisimasat pitsaanerusumik atorneqarnerisigut. Taamatut isumaqarput Nunatsinni Ilisimatusarnermik Siunnersuisoqatigiit, Ilisimatusarfik peqatigalugu nunami maani ilisimatusartarnermik erseqqinnerulersitsiniartut.
- Inuiaqatigiinni unammilligassat aaqqiiffiginiarlugit ilisimasassanik nutaanik pissarsiniarluta tapiissuteqarniarlutalu ilisimatusarpugut. Ilisimatusarnikkut inuiaqatigiit pillugit ilisimasaqarnerulissaagut, inuiaqatigiinnilu kulturikkut ineriartorneq sunniuteqarfigalugu. Nutaanik ilisimasaqalernikkut suleqatigiissutigineqarsinnaasut nutaat tunngavilerneqarlutillu naammassisaqarnerunissamut, tunisassianik ineriartortitsinissamut imaluunniit suliffissanik nutaanik pilersitsinissamut toqqaannartumik tunngaviliisinnaapput, Nunatsinni Ilisimatusarnermik Siunnersuisoqatigiit siulittaasuat Josephine Nymand aamma Ilisimatusarfimmi rektori Gitte Adler Reimer tusagassiorfinnut nalunaaruteqarlutik allapput.
Siunnersortit avataaneersut sulisinneqartarnerat isumalluutinik asuli atuinerusartoq
Ilisimatusartut taakku marluk isumaqarput, ilisimatusarneq inuiaqatigiit attanneqarsinnaasumik ineriartortinneqarnissaanut nunami pisariaqartinneqartoq, aamma suliaqartartunut tamanut iluaqutaassasoq.
- Ilisimatusarneq manna ingerlalluassappat ilisimatusartut, innuttaasut, ingerlatsiviit suliffeqarfiillu suleqatigiilluartariaqarput, ilisimatusarneq inuiaqatigiinni atorneqarlunilu sunniuteqarsinnaaqqullugu, Nunatsinni Ilisimatusarnermik Siunnersuisoqatigiit Ilisimatusarfillu allapput.
Ilaatigut nunami maani kalaallit assuutaat, inuunermi nalillit aamma meeqqat atuarfiisa pitsaassutsikkut ineriartortinneqarnerat pillugit ph.d.-tut allaaserineqartarsimapput. Ilisimatusartut taamaammat isumaqarput, ilisimatusarfiit ilisimasanik nutaanik inuiaqatigiinnik ilisimatusarnermillu ingerlatitseqqiisinnaasunik ullumikkut tunniussaqartartut.
- Ullumikkut ajoraluartumik assersuutigalugu takusarparput, Kalaallit Nunaanni ilisimatusarnerit siunnersortit avataaneersut sulisinneqartarnerisigut kinguarsarneqartartut. Tamannalu isumalluutinik asuli atuinerusarluni. Taamaammat pingaaruteqarpoq nunami maani ilisimatusartarnerup erseqqinnerulersinneqarnissaa, tamanna pissaaq ingerlatsiviit, suliffeqarfiit najukkanilu allani suliaqartartut assigiinngitsutigut suleqatigiinnerisigut, taamaalillunimi Kalaallit Nunaanni ilisimasat piffissami sivisuumi atorneqarsinnaallutillu annertusarneqassapput, Nunatsinni Ilisimatusarnermik Siunnersuisoqatigiit Ilisimatusarfillu naggasiillutik allapput.
Isumasioqatigiinneq Ilisimatusarfiup kaantiinaani ingerlanneqassaaq.