Ilisimatusartut misissuisut: Nunami ikuallattarnerit amerlanerulertussaassapput

Issittumi nunat, taakkunani ilaalluni Kalaallit Nunaat, nunami ikuallaffiuneruleriartorput.

Ilisimatusartut maanna misissorpaat nunami ikuallannerit innuttaasunit qanoq maluginiarneqartarnersut. Misissuinerup inerneri atorlugit nunat siunissami ikuallajanerusinnaasut naatsorsorneqarsinnaanerulissapput, ilisimatusartut oqarput.

- Ilisimatusarluni misissuinitsinni qulaakarniarparput Kalaallit Nunaanni nunat ikuallaffiusartut, taakkulu innuttaasunut qanoq sunniuteqartarnersut, Harold Lovell, ilisimatusarluni misissuinermik aqutsisoq oqarpoq.

Siornatigut misissuiffigineqarnerusimanngitsoq

Ilisimatusartut Nuummi Sisimiunilu workshopertitseqqammerput innuttaasut misigisimasaannik tusarniaallutik.

Nunatsinni nunami ikuallattarnerit pillugit misissuinerit annikitsuinnaapput, misissuinernilu innuttaasut misigisaat ilanngunneqartarsimanatik. Nuummi Sisimiunilu tusarniaanerit siullersaraat.

Nunap ikuallanneri pillugit nutaarsiassani ukiuni qulikkaani marlunni kingullerni allaatigineqarsimasut ilisimatusartut misissuiffigisimavaat, satellitinilu assilisat aamma misissorsimallugit.

- Maanna paasissutissat innuttaasunit pisinnaasagut paaseriikkatsinnut naleqqersuuppagut, innuttaasuniillu paasisagut nutaat aamma pillugit.

Siunissami aarlerisaaruteqartalersinnaasoq

- Nunami ikuallattarnerit pillugit paasissutissanik tunniusserusuppugut, aammali innuttaasut eqqarsaatersuutaat, innuttaasunut kinguneri, pisinnaaguttalu nunatat siunissami ikuallaffiunerulertussat taasinnaarusullugit, Harold Lovell oqarpoq.

Ilisimatusartut ilisimatitsipput nunatat ikuallaffiunerulersinnaasut oqartussanut paasissutissatut tunniunneqarsinnaalersinnaassasut, nunamilu ikuallattarnerit pillugit paasissutissat siammarneqarnerulersinnaassasut.

Nunami ikuallannerit eqqaavissuarnilu ikuallannerit arlallit ukioq manna nalunaarutigineqareerput.