Illersornissamut isumaqatigiissut: Chemnitzi illersornissamut ministeri ataatsimeeqatigereerlugu neriulluartoq
Aaja Chemnitzip illersornissamut ministeriungallartoq illersornissamut isumannaallisaanermullu isumaqatiginninniarnissaq pillugu ataatsimeeqatigaa – politikkeri IA-meersoq neriulluarpoq.
- Illersornissamut naalakkersuisuugallartorlu oqaloqatigiilluaqaagut.
Inuit Ataqatigiinnit Folketingimut ilaasortaq Aaja Chemnitz, Troels Lund Poulsen (V) ataatsimeeqatiginerani, Kalaallit Nunaata illersornissaq pillugu isumaqatigiissummut kissaatai apuutereerlugit oqarpoq.
Nunatta illersornissamut isumannaallisaanermullu inissisimanera pillugu Inuit Ataqatigiit Hotel Hans Egedemi innuttaasunut siusinnerusukkut ataatsimiititsivoq – pissarsiaqarfiulluarsimavorlu.
Innuttaasut ataatsimiinnermi apuussaat partiip illersornissamut tunngatillugu kissaataannut ilanngunneqarpoq illersornissamullu ministerimut saqqummiunneqarluni, IA tusagassiutinut nalunaarummi allappoq.
Kalaallit Nunaat peqataatinneqassasoq
Kalaallit Nunaat nunatut inissisimanertik tunngavigalugu isumannaallisaanermut tunngatillugu pingaarutilerujussuuvoq, taamaammat Inuit Ataqatigiit illersornissap isumannaallisaanerullu tungaatigut Kalaallit Nunaat annertuumik aningaasaliiffigineqartariaqartoq isumaqarput. Aaja Chemnitzillu Kalaallit Nunaata isumaqatiginninniarnissamut ilaatinneqarnissaa illersornissamut ministeriugallartumut naqissuserpaa
Aningaasaliissutillu Kalaallit Nunaanni innuttaasunut iluaqutaatinneqarnissaat taassuma piumasaraa, assersuutigalugu ilinniarnermut, suliffeqarfinnut aammalu Kalaallit Nunaanni sakkutooqarfiit inuinnarnit angallassinermut atugassaatinneqarnissaat aamma ersarissumik piumasaralugu.
Aallartitanilli attaveqaateqarnissaq pingaaruteqartoq Aaja Chemnitz naqissuserpaa:
- Nunarsuatta ulluni makkunani nunat akornaminni ileqqorisaat ernumanarsinnaasut eqqarsaatigissagaanni illersorsinnaanngivissanngilagut. Uannut pingaaruteqarsimavoq
aaqqiissutissat nunatsinnut tunngasut isumaqatiginninniutigineranni nunarput ilaatinneqassasoq aammalu aningaasaliissutissat nunatsinni innuttaasunut ajunngitsumik tutsinneqassasut, Aaja Chemnitz oqarpoq.
Neriuuteqarluartoq
Issittup eqqissisimasoqarfiunissaa pingaartorujussuuvoq taamaammat pisariaqanngitsumik sakkutigut annertusaasoqassanngitsoq Inuit Ataqatigiit naliliipput, aammali piareersimanata uninngaannassanngitsugut.
Partiip isumaa naapertorlugu Kalaallit Nunaata nakkutigineqarnera annertusartariaqarpoq, taamaalilluni oqartussaaneq illersorneqarsinnaassammat nunatsinnullu akuerineqanngitsunik isaasartut ningalassimatinneqassallutik, angallannermut tunngasut, internetsikkullu isumannaallisaaneq nukittorsarneqassasoq.
Saniatigut aallartitat suliaqassasut eqqaamaneqassasoq aammalu Inuit Ataqatigiinniit issittumi maligassiuisutut nunatta eqqissisimaffiunissaa piumasaqaatigineqartoq Inuit Ataqatigiit paasissutissiipput.
Aaja Chemnitzillu Troels Lund Poulsenip ataatsimeeqatiginera naammagisimaarpaa:
- Illersornissamullu isumaqatiginninniarnissamut neriuuteqarluarpunga, Aaja Chemnitz oqarpoq.